Babaen ti nabara nga arakup, naipaay ken ni Las Piñas City lone district Rep. Camille Villar a kandidato iti kinasenador iti tiket nga Alyansa para sa Bagong Pilipinas, ti panangyendorso manipud ken ni Quezon City Mayor Joy Belmonte.
Daytoy a tignay ti tampok iti panagkampania ni Villar itay nabiit iti Quezon City a nakiinnumananna iti nadumaduma a sektor.
Immun-unan nga inyedorso ni Muntinlupa City Mayor Ruffy Biazon ti kandidatura ni Villar iti eleksion iti daytoy Mayo 12.
Kas pagyamanna, inulit ni Villar ti karina a mangipangruna iti pagimbagan dagiti babbai, agtutubo, mailanglangi a sektor, ken itandudona ti nasaysayaat pay a serbisio iti salun-at ken edukasion.
Saan a Marcos:' Romualdez, Araneta ti mangiturturay it gobierno --Imee Marcos
Iti nasao a panagkampania, nakiraman ni Villar iti pannakaiwayat ti asemblea para iti gender and development nga inrusat ti gobierno ti Quezon City. Panggep ti nasao a pasken ti panangidur-as ti gender equality iti amin a sektor ti kagimongan, agraman ti edukasion, pannakayempleo, pannakataripato ti salun-at, ken pannakipartisipar iti politika.
Inimdengan pay ni Villar, nagtakem a deputy speaker iti Kamara, dagiti pakaseknan dagiti grupo iti transportasion, agraman dagiti drayber ken operador ti tryasikel.
Nagyaman ni Villar ken ni Belmonte iti suporta daytoy. Inkarina a kanayon a nakasagana a mangtulong kadagiti residente ti Quezon City no bilang mabotosan iti Senado.
Maysa ti Quezon City kadagiti kaaduan iti botante a siudad iti Metro Manila. Addaan daytoy iti 1,382,018 a rehistrado a botante maibasar iti rekord ti Commission on Elections (Comelec).
