Imbulos ni Joo Dae Yeong, ti Koreano a siklista a mangidadaulo iti 2025 Tour of Luzon, ti maudi a baelna a mangparmek iti makuna a "killer mountains" ti Benguet tapno iturayanna ti maysa kadagiti kadedekketan a panagrinnisiris a lumba ti bisikleta iti pakasaritaan, iti napabaro a Tour of Luzon, idi Huebes, Mayo 1.
Nagun-od ni Joo ti korona iti 6 a segundo laeng a nangitarayanna iti kasinnaitna iti yellow jersey a Filipino a ni Jan Paul Morales.
Saan a pulos a nagpaatiw ti 28-anios a top rider ti Gapyeong Cycling Team uray kalpasan a naplatan ti akinlikud a dalig ti bisikletana iti isasang-atna iti Siudad ti Baguio. In-inut a nasubbotna ti napukaw nga orasna ket nabaelanna pay laeng ti nakilumba nga addaan time a 4 nga oras, 21 a minuto, ken 31 a segundo a nangunor iti narikut a 177.54-kilometro nga Stage 8 a nangrugi iti Lingayen, Pangasinan ken nagpatingga iti uneg ti Camp John Hay.
Umdasen para iti dua a daras a national Korean champion tapno mayalatna ti overall individual title, a nakaurnonganna iti 22 nga oras, 21 a minuto, ken 8 a segundo kalpasan ti 8 a makapaksuy nga stage a nangrugi iti Paoay, Ilocos Norte ken nangtarus iti Ilocos Sur, La Union, Tarlac, Pampanga, Pangasinan, ken Benguet.
Saludsod ni Rep. Ortega ken ni Sara Duterte: Napudnoka kadi iti Filipinas wenno iti China?
Imbolsa ni Joo ti ₱1 a milion a premio.
Makuna a nakaskasdaaw ti inalat ni Joo ta saan a pulos a nauksob kenkuana ti yellow jersey manipud rugi agingga iti ngudo ti lumba ken nalasatna iti kaawan ti tallo kadagiti uppat a kakaduana iti team a nairaman iti crash iti Stage 6.
“I’m not thinking that much about the yellow jersey. I just kept on going,” kinuna ni Joo. “There are many Filipino strong riders and I just followed (today). I just want to finish well.”
Ginundawayan met ni Jan Paul Morales ti Standard Insurance Team, namin-adu a nagkampeon iti Ronda Pilipinas, ti kinapamiliarna iti nasang-at a yan ti Lion’s Head nga agturong iti finish line ket nagleppas a maikadua iti stage winner a ni Joshua Pascual ti Excellent Noodles Team.
Ngem ti stage time-na a 4:18:34, di nakaanay a nangtunaw iti pagabantean nga oras ni Joo uray sangkabassit la koman ti 6 a segundo laeng a nagkamatanna ken ni Joo para iti individual general classification.
Nupay kasta, agyamyaman latta ni Morales uray naatiw.
“Siempre, adda bassit a panangtagisayang. Ngem naragsakak metten iti performance-ko uray adda an-annayek,” kinuna ni Morales, a nakapagsubli iti lumba kalpasan ti pannakasemplangna iti maudi nga 400 a metro ti Stage 1 iti Paoay.
“Daytoy ngamin road race, race ti amin daytoy ket. Kunak idi a no nagkampeonakon, agretiroakon. Ngem saanak pay a nagkamkampeon, isu nga adda pay maysa,” innayon ti 39-aniosen a siklista.
Kabayatanna, nagtalinaed ni Joo iti peloton iti pakabuklan ti Stage 8, ken nakamatna pay ti maikapat a grupo nga agturong iti importante a 10 a kilometro iti yan ti nalatak a Lion’s Head iti igid ti Kennon Road.
Iti maysa a paset ti lulmba, naala pay ketdi ni Mervin Corpuz ti MPT Drivehub Team ti provisional overall lead iti 2:30 a minuto kalpasan a nairaman iti nine-rider lead pack kadagiti patad a kalsada ti Pangasinan, sakbay a naarus met laeng iti maudin a 15 a kilometro.
Ni met Joshua Pascual, a tubo ti Aritao, Nueva Vizcaya, iti biangna, ket timpuar manipud iti awan tapno kigtotenna ti amin ket kinoronaanna ti bagina a kas “Eagle of the Mountain” ken isu payen ti nangyalat iti stage victory iti time-na a 4:16:14.
“Daytoy ngatan kadakkelan a balligik. Arapaapko ti ag-kampeon,” kinuna ni Pascual.
Dagiti dadduma pay iti Top 10: ni third placer a Jonel Carcueva ti MPT Drivehub (22:22:00), Nichol Pareja ti Victoria Sports (22:22:02), Jeremy Lizardo ti Standard Insurance (22:23:40), Rench Michael Bondoc ti 7-Eleven Roadbike (22:24:50), James Paul Escumbien ti Go for Gold (22:24:42), Jerico Lucero ti Go for Gold (22:24:50), Ronald Oranza ti Standard Insurance (22:24:53), ken ni Rustom Lim ti MPT Drivehub (22:25:50).
Inyalat met ti MPT Drivehub ti team general classification iti 88:22:02 nga orasda ket nagun-odda ti ₱1 a milion a premio. Maikadua ti Standard Insurance iti 11 a segundo laeng a nagkamatanda iti MPT Drivehub. (Kristel Satumbaga-Villar/MANILA BULLETIN)
