Kiniddaw ni Senadora Imee Marcos iti Office of the Ombudsman (OMB) nga imbestigarenda ti pannakaarestar ken pannakayawat ni dati a presidente Rodrigo Duterte iti International Criminal Court (ICC).
Mismo a ni Marcos, a daulo ti Committee on Foreign Relations ti Senado, ti napan iti opisina ti OMB iti Quezon City ita nga aldaw, Mayo 2, tapno idatagna ti report-na a politika ti makaigapu iti pannakaarestar ni Duterte.
Nakemmeg ken nayawat ti dati a presidente ti ICC idi Marso 11 tapno sanguenna ti kaso a crime against humanity, ket sibabalud itan iti ICC iti The Hague, Netherlands.
Kiniddaw ni Marcos nga imbestigaren koma ti OMB dagiti opisial ti gobierno a nainaganan iti report ken maidarum ken madusa kas mayannurot iti paglintegan ti pagilian.
LTO, nangipaulog iti show cause order iti babai a motovlogger gapu iti viral a road rage iti Zambales
Segun ken ni Marcos, nalabsing ti Article 124 ti Revised Penal Code wenno ti Arbitrary Detention, ti Republic Act No. 3019 wenno ti Anti-Graft and Corrupt Practices Act, ti Usurpation of Judicial Functions, ken ti Republic Act No. 7438.
Kinuna ni Marcos a dakkel ti panagtalekna nga awan ti idumduma ti Ombudsman, ket saan nga agbuteng a mangdusa kadagiti rumbeng a madusa. (Czarina Nicole Ong Ki/Manila Bulletin//Lito Hilidon/Bannawag)
