Saan a pudno a nakikontrata ti InfinitUs Marketing Solutions Inc. iti Embahada ti China ti Manila.
Daytoy ti sungbat ti kompania nga InfinitUs a nakabase iti Siudad ti Makati iti alegasion a panangmanipularda iti kapanunotan ti publiko ken panangitandudo iti interes ti China babaen ti social media.
Iti maysa nga statement, kinuna ti Labe Law Office, abogado ti InfinitUs, a saan a pudno ti alegasion ni Senador Francis Tolentino nga adda kontrata ti InfinitUs ken Embahada ti China, wenno iti uray ania man a ganggannaet a pagilian, nga agusar iti troll, disinformation, wenno illegal nga aktibidad iti internet.
Segun iti InfinitUS, saan a napasingkedan ti maipagarup a "service agreement," saan a napirmaan, ken saan nga ammo ti kompania, ket maibilang ngarud a maysa a palso a naaramid tapno maibagay iti napolitikaan a naratibo.
Saludsod ni Rep. Ortega ken ni Sara Duterte: Napudnoka kadi iti Filipinas wenno iti China?
Innayon ti InfinitUs a saanda a pulos a makipaset iti trolling, panangriribuk nga online, wenno panangallilaw, idinto nga agtigtignayda iti nalawag, etikal ken data-driven a komunikasion, ket ti di nainkalintegan a panangiladawan iti serbisioda a kas trolling activity ket inuulbod, mangpadpadakes, ken mamagpeggad kadagiti tao ken klienteda.
Ngem inaklon ti InfinitUs a pudno ti tseke nga imparang ni Sen. Tolentino iti maysa a bista ti Senado, nga impaay ti Embahada ti China iti Infinitus nga aggatad iti ₱930,000 kas bayad ti serbisioda.
Dinillaw ti InfinitUs ti di autorisado a pannakaiparang ti financial record-da iti publiko, ket mabalin a nalabsing ti banking secrecy laws, financial regulation, ken data privacy law.
Itay kallabes, kinuna ni Tolentino nga awisen ti Special Committee on Maritime and Admiralty Zones ti Senado ti InfinitUs a tumabuno iti sumaruno a bista a maangay inton Mayo 5 tapno mailawlawagda ti biangda mainaig iti maipagarup a pannakikontratada iti Embahada ti China idi 2023. (Hannah L. Torregoza/Manila Bulletin//Lito Hilidon/Bannawag)
