Linuktan ni dati a gobernador ti Ilocos Sur Luis "Chavit" Singson, chairman ti LCS Emon, ti umuna a planta ti electric jeepney iti pagilian iti Lima Park iti Siudad ti Lipa, Batangas idi Abril 30.
Impakaammo ni Singson a 500 nga electric jeepney iti binulan ti kabaelan a partuaten ti pinatakderna a planta a nakikaduaanna kadagiti Koreano nga agparpartuat iti lugan.
Aggatad ti electric jeep iti ₱1.2 a milion ti tunggal yunit para kadagiti kooperatiba ti transportasion.
Maipalagip nga inkari ni Singson a maikkan iti e-jeepney dagiti kooperatiba ti transportasion idi impakaammona ti panagngayangayna a kas senador.
Pannakangiwat ti Kamara, dinillawna ti survey a 50% kadagiti Filipino ti kontra iti impeachment ni Sara Duterte
Nupay immatras ni Singson iti panagkandidatona maigapu iti salun-atna, tinungpalna latta ti karina a pagnumaran dagiti drayber ken operator ti dyip iti pagilian.
Kinuna ni Undersecretary ti Department of Transportation (DOTr) Ramon Reyes, a nangibagi ken ni Sekretario Vince Dizon, a suportaran ti ahensia ti insayangkat ni Singson para iti industria ti transportasion.
Napirmaan ti memorandum of understanding (MOU) para iti pannakaitandudo ti e-jeepney program iti nagbaetan da Singson, DOTr, ti Development Bank of the Philippines (DBP), Land Transportation Franchising Regulatory Board (LTFRB), ken ti Land Transportation Office (LTO).
Nagpirma met iti kontrata dagiti grupo ti jeepney operator a gimmatang iti e-jeepney.
Kinuna ni Singson a partuat ti Koreano dagiti e-jeepney, ket isuda ti umuna a pagaramidan iti lugan a patarayen ti koriente iti Filipinas, a manamnama a mangitunda iti eco-friendly a transportasion. (Danny Estacio/Manila Bulletin//Lito Hilidon/Bannawag)
