Aganay a 214 a polis manipud kadagiti nadumaduma a probinsia ti Cordillera Administrative Region (CAR) ti maipatulod iti Abra kadagiti sumarsaruno nga aldaw tapno tumulongda a mangipasigurado iti seguridad bayat ti eleksion inton Mayo 12.
Nayon pay dagitoy ti datin a nasurok a 100 a police personnel a naipan met laeng iti Abra sipud umuna a lawas ti Marso.
"Aggapu dagitoy iti nadumaduma a probinsia ket inamnamaenmi a maipan ida idiay Abra makalawas sakbay ti eleksion,” kinuna ni Police Brig. Gen. David Peredo, regional director ti Police Regional Office-CAR (PROCAR) iti interview ti media idi Biernes, Mayo 2.
Segun pay ken ni Peredo, maipatulod pay iti Abra dagiti mobile patrol unit para kadagiti augmentation team.
Walo iti 10 a biktima iti road crash iti SCTEX, agturong iti religious summer camp
“Mausar ti nayon a manpower tapno maipaayan iti seguridad dagiti presinto a pagbotosan, ken masuportaran iti quick reaction team,” kinuna ni Peredo.
Addaan ti Abra iti 281 a polling precincts ken 539 a regular force, ket kinuna ni Peredo a maikkan iti minimum a dua a police personnel ti tunggal presinto a pagbotosan.
Rinugian met ti PROCAR ti aginstolar kadagiti closed circuit television camera (CCTV) iti Pidigan, Bangued, ken Tayum a nairaman kadagiti dadduma a lugar a kasapulan a maipaayan iti nayon a rekursos tapno masigurado ti kinatalged ti publiko ken ti integridad ti eleksion
“Mainayon dagitoy (a CCTV) ken mamon-monitor PEMAC (Provincial Election Monitoring and Action Center) iti police provincial headquarters," kinuna ni Col. Carolina Lacuata, PROCAR regional information officer.
Kinunana a na-reactivate ti Task Force Abra, nga idauluan ti hepe ti Northern Luzon Area Police Command a ni Maj. Gen. Ronnie Cariaga, tapno mapatibker ti amin a security measure sakbay ken bayat ti eleksion.
Sakbayna, kinuna ti Commission on Elections-Cordillera a nainget ti panang-monitor-da iti probinsia ti Abra tapno saan a maideklarar daytoy iti kontrol ti Comelec. (Liza Agoot/Philippine News Agency)
