Ni Ma. Ahtisa Manalo, tubo ti Quezon Province, ti nangyalat iti titulo a Miss Universe Philippines 2025, iti koronasion a naangay iti SM Mall of Asia Arena iti Siudad ti Pasay idi Mayo 2.
Inyalat ni Teresita Ssen Marquez, ti Muntinlupa City, ti 1st Runner-up; idinto a 2nd Runner-up ni Yllana Marie Aduana ti Siniloan, Laguna.
Nakoronaan met kas Miss Cosmo Philippines ni Chelsea Fernandez ti Sultan Kudarat, Miss Supranational Philippines ni Ma. Katrina Llegado ti Taguig City, ken Miss Eco Philippines ni Gabriella Mai Caraballo ti Cebu City.
Ni Ahtisa, 27, ti mangibagi iti Filipinas iti Miss Universe Competition a maangay iti Thailand inton Nobiembre 21. Ni outgoing Miss Universe Philippines 2024 Chelsea Manalo ti nangbalangat iti korona ni Ahtisa.
Dua ti natay, 3 ti nadangran iti aksidente iti NAIA Terminal 1
Kas napili a Miss Universe Philippines 2025, automatiko a nagun-od ni Ahtisa dagiti titulo a Miss PLDT, Miss Philippine Airlines, Ambassador for Bingo Plus, Miss Surge, Ambassador for Fina, Ambassador for Jell Life, Ambassador for New Moon, ken Ambassador for So-En.
Iti benneg ti evening gown competition, naipagalis ni Ahtisa iti entablado, ngem inusarna daytoy iti Q&A a nangsungbat iti saludsod kenkuana a "Kunada a ti naimbag a lider ket mangituray babaen ti nasayaat a pagulidanan. Isalaysaymo man kadakami ti maysa a pasamak iti biagmo a nangidauloka babaen ti panagbalinmo a nasayaat a pagulidanan ken no ania ti epekto daytoy?"
Insungbat ni Ahtisa: "Natnagak iti entablado itay laeng. Ngem siak ti tao a no matumba, siguraduek a tumakderak a napigpigsa. Idi napan a tawen, addaak ditoy nga entablado ket iti maikadua a gundaway ita a tawen, addaak ditoy a mangipan iti amin a kabaelak tapno agbalin a Miss Universe Philippines ta daytoy ti arapaapmi ken ni lelangko a pimmusay ita a tawen. Ket daytoy ti datonko kenkuana."
Sakbay a nagbalin a Miss Universe Philippines, nakoronaan ni Ahtisa a kas Bb. Pilipinas International idi 2018. Inyalatna ti 1st runner-up iti Miss International 2018 a naangay iti Tokyo, Japan.
Nagun-od ni Ahtisa ti second runner-up iti Miss Universe Philippines 2024. (Robert Requintina/Manila Bulletin//Lito Hilidon/Bannawag)
