Walo nga agngayangay wenno agdadamo a mannurat iti Ilokano ti napili a kas Fellows iti maika-14 nga edision ti Pasnaan, ti workshop para kadagiti mannurat nga Ilokano nga isaysayangkat ti Gunglo Dagiti Mannurat nga Ilokano iti FIlipinas ken Ballasiw-Taaw (GUMIL Filipinas).
Dagiti Fellow: Domingo A. Presa (Abut, Quezon, Isabela) ken Althea Bernardo (Ampalioc, Luba, Abra) para iti ababa a sarita; Aeriele C. Orbiso (Siudad ti Urdaneta, Pangasinan) para iti daniw a para ubbing; ken da Lucena Suniga-Malapira (Capannikian, Claveria, Cagayan), Concepcion Aguino-Ramos (Abaca, Bangui, Ilocos Norte), Eliza Milagros A. Rivera (Brgy. 6, Bacarra, Ilocos Norte), Nique Jade B. Tarubal (San Quintin, Pangasinan), ken Jerry M. Tayawa (Curva, Pamplona, Cagayan) para iti daniw.
Agpaay a panelist da Cles B. Rambaud, Juan Al. Asuncion, Joel B. Manuel, Daniel L. Nesperos, Estela A. Bisquera-Guerrero, ken Aileen R. Rambaud.
Maangay ti workshop inton Mayo 16-18, 2025 iti Bangui National High School iti Bangui, Ilocos Norte. Maisayangkat daytoy babaen ti tulong ti National Commission for Culture and the Arts (NCCA), iti panangiwardas ti GUMIL Filipinas, ken iti pannakitinnulong ti Bannawag.
Pacnis, indauluanna dagiti nangabak iti on-the-spot a panagsurat iti daniw
Agpaay a workshop director ni Dr. Freddie P. Masuli, chairman ti Seminar-Workshop Committee ti GUMIL Filipinas nga idadauluan ni Ariel Sotelo Tabag. Project director met ni Abraham C. Aguino Jr. ti Bangui National High School a pagpapaayan a prinsipal ni Joel B. Manuel.
Nagpaay a kameng ti Pasnaan 14 screening committee da Dr. Raquelito B. Cenal, Rolando A. Seguro Jr. ken Derick Marcel F. Yabes. (MLT)
