Imbatad ni Sekretario ti Department of Transportation (DOTr) Vince Dizon a sagrapen ti Solid North Bus Transit Inc. ti "kakaruan a dusa" kalpasan a maysa kadagiti yunitna ti nairaman iti nadagem nga aksidente iti Subic–Clark–Tarlac expressway (SCTEX) a nakatayan ken nakadunoran ti adu a tattao.
Segun ken ni Dizon, iti waragawagna idi Mayo 2, maipila ti administratibo ken kriminal a reklamo kontra iti kompania ti bus gapu ta adda natay ken nadangran.
Idi Mayo 1, uppat a lugan ti dinungpar ti bus a Solid North iti SCTEX iti Tarlac City, a nakatayan ti 10 ken nakadangran iti 37. Segun kadagiti report, maipagarup a nakaturog wenno nagdungsa ti drayber ti nasao a bus.
Binilin a dagus ni Dizon ti Land Transportation Franchising and Regulatory Board (LTFRB) a mangipaulog iti suspension order a maibusor iti Solid North Bus.
Walo iti 10 a biktima iti road crash iti SCTEX, agturong iti religious summer camp
Itay Mayo 2, binaon ti Sekretario ti ahensia nga idarumda ti drayber ti bus ken ti kompania.
Imbilinna pay ti pannakasuspenso ti amin a lugan ti kompania, nga agarup 300 a bus, bayat ti imbestigasion.
Tapno maliklikan ti kapadana a pasamak, ilunglungalong ni Dizon ti pannakarepaso ti agdama a road safety protocols tapno masigurado ti kinatalged ken kinanam-ay dagiti agbibiahe.
Iti pannakisaritana kadagiti kompania ti bus, inlawlawag ni Dizon kadagiti operator a masapul a siguraduenda a nakakondision dagiti drayberda nga agmaneho.
Naiparang kas paset ti posible a solusion ti mandatory drug test ken breath analyzer para kadagiti drayber, agraman ti pannakaipatungpal iti oras ti panagtrabaho dagiti drayber.
Segun ken ni Dizon, nalawag a saan nga agkurri ti agdama a pannakaipatungpal dagiti annuroten, ket inaklonna a napaay ti gobierno ken dagiti kompania ti bus a mapagserbian dagiti agbibiahe ket masapul a makipagbaklayda iti parikut ken masapul nga adda aramidenda maipapan iti daytoy. (Dexter Barro II/Manila Bulletin//Lito Hilidon/Bannawag)
