Masapul a siguraduen ti nailian a gobierno a tinawen a ngumato ti badiet ti Department of Education (DepEd) tapno matamingda ti parikut ti functional illiteracy ti pagilian.
Daytoy ti kinuna ni Cagayan de Oro 2nd district Rep. Rufus Rodriguez ita nga aldaw, Mayo 3, mainaig iti report ti Philippine Statistics Authority (PSA) a nangato ti functional illiteracy rate ti pagilian.
Segun iti PSA, 18.9 a milion a Filipino a nagturpos iti sekondaria nga edukasion idi 2019 ken 2024 ti maibilang a “functional illiterate," a kaipapananna, kabaelanda ti agsurat, agbasa, ken agkuenta ngem dida matarusan ti binasada.
Walo iti 10 a probinsia ti addaan iti “highest basic illiteracy” rate ti adda iti Mindanao, a pakairamanan ti Tawi-Tawi (36 porsiento), Davao Occidental ken Basilan (23 porsiento), Sarangani (18 porsiento), Lanao del Sur (17 porsiento), Zamboanga del Sur (16 porsiento), Sultan Kudarat (14 porsiento), ken Maguindanao (13 porsiento). Nairaman iti sangapulo a probinsia ti Northern Samar (20 porsiento) ken Samar (16 porsiento).
Walo iti 10 a biktima iti road crash iti SCTEX, agturong iti religious summer camp
Impaganetget ni Rodriguez a kasapulan a maponduan dagiti empleado kasta met ti impraestruktura ken alikamen a kasapulan iti elementaria ken sekondaria a pagadalan.
Segun ken ni Rodriguez, ad-adu a siled-pagadalan, ad-adu a mannursuro, naan-anay a panagsanay dagiti mannursuro, ad-adu a libro, ad-adu nga alikamen iti pagadalan kas iti kompiuter ken tablet para kadagiti adalan nga iti elementaria ken high school, kangrunaan iti Mindanao a yan ti nangato a functional illiteracy rate.
Kayat a maammuan ni Rodriguez no ania ti panggep nga aramiden ti DepEd iti parikut iti edukasion iti Mindanao, tapno ammona ti aramidenna iti biang ti Kongreso, kas koma iti pannakailungalong ti dakdakkel a pondo para kadagiti elementaria ken sekondaria a pagaladan tapno maallangon dagiti adalan, ket saandan nga agbalin a “functional illiterate."
Nalidayan met ni Rodriguez iti desision ti Kongreso a nangkissay iti computerization fund ti DepEd ita a tawen iti di kumurang ₱10 a bilion.
Indagadag ni Rodriguez ken ni Presidente Marcos Jr. a nayonanda ti pondo manipud iti savings ti gobierno ken dagiti nailatang iti nailian a badiet a mabalinna nga i-realign. (Joseph Pedrajas/Manila Bulletin//Lito Hilidon/Bannawag)
