Naala ni Camille Villar ti suporta ni Mayor ti Siudad ti Dasmariñas Jennifer Barzaga iti panagngayangayna a senador, ken dinakamat ti local chief executive ti kari ni Villar a pannakapasayaat ti komunidad ken ti panangipaayna iti kritikal a serbisio iti siudad.
Iti panagsaona iti nasurok a 12,000 a tao iti naragsak a Zumba event a naangay iti Dasmariñas Football Field, indagadag ni Barzaga kadagiti umili nga agkaykaysada a mangsuporta ken ni Villar, a dinayawna ti pakasaritaan ti pamilia Villar a nangsuporta iti siudad babaen dagiti proyekto iti impraestruktura ken para iti kagimongan.
“Adu ti naitulong ni Camille Villar ken ti pamiliana iti panagrang-ay ti siudadmi,” kinuna ni Barzaga. “Iti kaaddana iti Senado, maaddaantayo iti napigsa a kadua a makatulong a mangrisut kadagiti nabayagen a parikut, kas iti kangrunaan a serbisio a suplay ti danum.”
Dinipensaan ni Barzaga ti administrasionna kadagiti mangbabbabalaw maipapan iti agkurkurang a suplay ti danum, ket patienna a maan-anay ti pannakitinnulong kadagiti mangipapaay iti serbisio no mairaman ni Villar.
Camille Villar, nakirambak iti Bangus Festival ti Dagupan; ingganetgetna ti agtultuloy a suporta para iti panagkalap, agrikultura
Nagyaman ni Villar kadagiti umili ti Dasmariñas gapu iti nabara a panangabrasada ken ti panagtalek kenkuana ni Mayor Barzaga.
"Pudno a napadayawanak iti suportayo. Mangngegko dagiti pakaseknanyo, nangruna maipapan iti danum, ket ikarik a tumulongak a mangsapul iti pudno a solusion,” kinuna ni Villar. “Maikariankayo iti nasaysayaat a serbisio, ket siguraduekto a mangngeg dagiti timekyo.”
Kiniddaw ni Villar ti agtultuloy a panagibtur bayat nga ikagkagumaan ti lokal a gobierno ti makitinnulong iti utility provider, ti PrimeWater, tapno tamingenda ti kasasaad ti suplay ti danum. Inkari ni Villar nga itantandudona dagiti napasayaat a kangrunaan a serbisio ken panagdur-as ti impraestruktura, iti lokal ken nasional.
