Imbilin ni Presidente Ferdinand Marcos Jr. ti nasaknap a pannakaisardeng kadagiti saan a natalged a maar-aramid iti sektor ti transportasion ti pagilian, kalpasan ti dua a napegged nga aksidente iti napalabas nga uppat nga aldaw.
Iti maysa a video message, nakipagrikna ni Marcos iti pamilia dagiti biktima dagiti aksidente a napasamak iti SCTEX toll plaza ken iti NAIA Terminal 1.
Binilin ni Marcos ni Sekretario ti Department of Transportation (DOTr) Vince Dizon nga agtignay a sipipinget babaen ti pannakabigbig ken pannakadusa kadagiti naglabsing ken mangisaad kadagiti kasapulan a reporma tapno maliklikan ti ad-adu pay a pannakapukaw ti biag.
Maysa kadagiti reporma ti nailian a pannakatingiting dagiti bus operator, a buyogan ti nabatad a pannusa kadagiti kompania a saan a makatungpal iti pagannurotan ti kinatalged ken pannakamantener.
Maikadua a set ti ebidensia kontra ken ni Duterte, indatag ti ICC prosecutor
Binilin met ni Marcos ti Department of Labor and Employment (DOLE) a kitaenda dagiti saan a natalged ken mananggundaway nga aramid iti sektor ti transportasion.
"Saan koma a pagpeggadan ti biag ti pannakabannog ti drayber, naunday nga oras ti panagmaneho, ken pressure tapno matungpal dagiti quota," kinunana.
Imbilin pay ti presidente ti pannakarepaso ti pannakaipaay iti driver's license tapno masigurado a dagiti laeng responsable ken makabael nga agmaneho--iti pribado man wenno para iti publiko a lugan--ti mapalubosan iti kalsada. (Argyll Cyrus Geducos/Manila Bulletin//Lito Hilidon/Bannawag)
