Iti laksid a naglusulosen iti serbisio, agtultuloy dagiti kaso kontra ken ni Patrolman Francis Steve Fontillas, ti vlogger a polis a nag-viral gapu iti panangdildillawna ken ni Presidente Ferdinand Marcos Jr. ken kadagiti nangangato nga opisial ti Philippine National Police (PNP) mainaig iti pannakaarestar ni dati a presidente Rodrigo Duterte.
Segun ken ni NAPOLCOM vice chairman ken executive officer Atty. Rafael Vicente Calinisan, makedngan ita a lawas dagiti nakaidaruman a kaso ni Fontillas.
“Uray no pinilina ti aglusulos, agtultuloy dagiti administratibo a kaso a maibusor kenkuana,” kinuna ni Calinisan. Innayonna a naipaayan ni Fontillas iti due process ken naikkan iti gundaway a mangngegan ti biangna.
Segun iti Quezon City Police District (QPCD), opisial a naglusulos ni Fontillas iti PNP idi Abril 10..
Maikadua a set ti ebidensia kontra ken ni Duterte, indatag ti ICC prosecutor
Inaprobaran ti hepe ti National Capital Region Police Office a ni Police Major General Anthony Aberin ti irrevocable resignation ni Fontillas.
Impila ti NAPOLCOM ti administrative cases gapu iti grave misconduct ken conduct unbecoming of a police officer kontra ken ni Fontillas. Nangpila met ti QCPD iti criminal complaint nga inciting to sedition kontra kenkuana.
"Ti panag-resign, saan a pakalisian iti administratibo, wenno uray kriminal, a nakabasolan. No makedngan isuna iti dismissal, kakuykuyog daytoy ti agnanayon a diskualipikasion nga agtakem iti ania man a posision iti gobierno," kinuna pay ni Calinisan. (rva)
