Inruar ti Philippine Statistics Authority (PSA) itay nabiit ti resulta ti 2024 Functional Literacy, Education, and Mass Media Survey (FLEMMS), a napagsasaritaan iti nadumaduma a taripnong, a pakairamanan ti Second Congressional Commission on Education (EDCOM 2).
Iti maysa nga statement idi Mayo 1, kinuna ti EDCOM2 nga 18 a milion a Filipino ti nagturpos iti high school ngem maibilangda a "functionally illiterate.”
Maysa a nailian a surbey Ti FLEMMS nga agkalkalap iti impormasion mainaig iti basic ken functional literacy rates, ken ti kualipikasion ti educational skills ti populasion.
Impalgak ti EDCOM 2 iti maysa a hearing ti Committee on Basic Education ti Senado ti resulta ti FLEMMS nga insayangkat ti PSA iti maudi a paset ti 2024.
Maikadua a set ti ebidensia kontra ken ni Duterte, indatag ti ICC prosecutor
Ngem segun ken ni Undersecretary for Strategic Management ti Department of Education (DepEd) Ronald Mendoza, masapul a mailawlawag ti nadakamat a resulta, ta di umisu ti pannakaipaulog ti dadduma a bilang, kalpasan a naisurat kadagiti headline ti padamag a nagbiddut iti panangibagada a 18.9 a milion a nagturpos iti hayskul idi 2024 ti saan a makaawat, maibatay iti resulta ti FLEMMS.
Inlawlawag ni Mendoza a ti datos a naiparang iti hearing ti Senado ket ibagbagana a "18.9 a milion a Filipino nga agtawen manipud 10 agingga iti 64 ti maibilang a kas functionally illiterate, a kaipapananna a kabaelanda ti agbasa, agsurat, ken agkuenta ngem marigatanda a mangtarus, uray ania man ti nagadalanda."
Daytoy a bilang, kinuna ni Mendoza, ti mangibagi iti nasaknap a paset ti populasion--saan laeng a dagiti nagturpos iti high school manipud iti sistema ti DepEd.
Inlawlawag pay ni Mendoza a ti bilang dagiti estudiante iti Junior High School (JHS) ken Senior High School (SHS) iti SY 2024–2025 ket agdagup laeng iti 11.6 a milion, isu a biddut ti panangipapan a dagiti laeng nagturpos iti high school ti dakdakamaten ti bilang a 18.9 a milion.
Innayon ni Mendoza a kadagiti agtawen iti 18 a manamnama nga agturpos wenno nagturposen iti SHS, 80 a porsiento (wenno 1.5 a milion iti dagup a 1.9 a milion) ti maibilang a “functionally literate,” a nangipaay iti umisu a pattapatta iti literacy levels kadagiti nagturpos iti SHS para iti SY 2024-2025.
Nupay bigbigen ni Mendoza a saan a nalaka a risuten dagiti parikut iti edukasion ti pagilian, impaganetgetna a masapul ti panangilinteg kadagiti fact tapno ammotayo nga addatayo iti umisu a dalan. (Merlina Hernando-Malipot/Manila Bulletin//Lito Hilidon/Bannawag)
