Impalgak ti Chief Observer ti European Union Election Observation Mission (EU-EOM) ita nga aldaw, Mayo 7, a natalna ken naanayas pay laeng ti aktibidad a mainaig iti eleksion, nupay naipan dagiti dadduma a kakaduada kadagiti election hotspot.
Kinuna ni Chief Observer Marta Temido nga awan pay ti pangta iti biag ken wayawaya dagiti observer gapu iti impaay a seguridad ti nailian a gobierno.
Impakaammo daytoy ni Temido iti press conference ti naangay a send-off ceremony dagiti 104 a short-term observer a mangikalawa iti trabaho dagiti 72 a long-term observer a naipanen iti nadumaduma a rehion ti pagilian.
Agpaliiwda a maibatay iti prinsipioda, ken mangtingiting kadagiti panagkampania, ken makiuman kadagiti autoridad ti eleksion.
PUV consolidation, linuktan manen ti DOTr
Ngem inlawlawag ni Temido a saan pay a pinal ti report-da maigapu iti komprehensibo a wagas ti panagsukisok nga usarenda a pangtingiting iti eleksion ken kadagiti mainaig iti eleksion nga aktibidad.
Iparang ti EU-EOM dagiti paliiwda inton Mayo 14, dua nga aldaw kalpasan ti panagbobotos inton Mayo 12.
Panggep ti EU-EOM a tumulong iti kinatarnaw ti eleksion, a dida makibiang wenno patalgedan ti resulta daytoy. (Raymund Antonio/Manila Bulletin//Lito Hilidon/Bannawag)
