Saan nga inanamongan ti Pre-Trial Chamber (PTC) I ti International Criminal Court (ICC) ti kiddaw ti defense team ni dati a presidente Rodrigo Duterte a mangikkat iti dua a hues a mangikeddeng iti isyu ti hurisdiksion ti ICC iti kaso.
Iti 4-panid a dokumento iti website ti ICC idi Mayo 6, inkeddeng ti PTC a waswasen ti kiddaw dagit abogado ni Duterte.
Segun iti Article 41 ti Rome Statute ken Rules 34 ken 35 ti Rules of Procedure and Evidence, ti pannakaikkat ti maysa a hues iti panagdesision iti maysa a kaso ket mabalin laeng a kiddawen ti maseknan a hues a direkta iti Presidency, a maisupadi iti pannakaikkat a mabalin a kiddawen ti Prosecution wenno ti tao a maim-imbestigar wenno mangimbestigar a maidatag iti Presidency.
Kinuna ti PTC a ti panagkiddaw iti pannakaikkat ti maysa a hues iti Presidency ket saan a paset ti naibatay iti linteg a teksto. Kas sinao ti Presidency, saan a mabalin a dakamaten dagiti partido ti pre-emptive request a ti maysa a hues ti mangkiddaw iti pannakaikkatna, ket ti kastoy a panagtignay ti awanan iti procedural propriety.
Agngayangay a diputado ti Pasig Ian Sia, diniskualipikar ti Comelec
Naibatay daytoy a pangngeddeng iti petision nga impila ti defense team ni Duterte idi Mayo 1 a nangkuestionar iti hurisdiksion ti ICC iti kaso ni Duterte.
Iti naipila a petision, kiniddaw dagiti abogado ni Duterte a saan a mairaman da Judge Reine Adélaide Sophie Alapini-Gansou ken Judge María del Socorro Flores Liera a mangipaay iti pangngeddengda gapu iti maipagarup nga adda idumduma dagitoy.
Dagiti nadakamat a hues ti ICC ti nangaprobar iti pannakaisayangkat ti preliminary investigation kontra ken ni Duterte.
Sinupiat ti prosecution ti petition idi Mayo 5, ket dinawatda a mawaswas koma ti kiddaw ti depensa.
Sumango manen ni Duterte iti PTC inton Septiembre 23 para iti confirmation of charges hearing. (Raymund Antonio/Manila Bulletin//Lito Hilidon/Bannawag)
