Imbilin ti Land Transportation Office (LTO) idi Martes, Mayo 6, iti babai a motovlogger nga isuko daytoy ti driver’s license-na kalpasan ti suspension order a naipaulog kontra kenkuana mainaig iti insidente ti road rage iti Zambales a nag-viral iti social media.
Saan a nagatendar ti vlogger, a pagaammo kas Yanna Motovlog, iti hearing idi Mayo 6, ket imbaonna laeng ti abogadona a nangibasa iti surat ti panagdawatna iti pammakawan a naiturong iti komite ti LTO a mangim-imbestigar iti kaso ken iti amin a tattao a nairaman iti insidente.
Kinuna ni LTO Chief ken Assistant Secretary Vigor D. Mendoza II a natudingan ti vlogger agingga iti Huebes, Mayo 8, saan la a tapno isukona ti driver’s license-na no di ket idatagna pay iti LTO ti motorsiklo nga inusarna kabayatan ti insidente para iti inspeksion.
“Impaulogmi ti 90-aldaw a preventive suspension iti driver’s license-na kas paset ti agtultuloy nga imbestigasion iti nasao nga insidente. Iti kaawanna bayat ti hearing ti kaso, imbilinmi kenkuana, babaen ti abogadona, nga isukona ti driver’s license-na. Dayta ket para iti bukodna a pagimbagan,” kinuna ni Mendoza.
Kiko Pangilinan, ingganetgetna ti platapormana a seguridad iti taraon kadagiti botante iti Ilocos Sur
Iti hearing, kinuna ti abogado ti vlogger a pinili ni Yanna Motovlog ti di agatendar gapu iti pakaseknanna iti seguridadna, a kunana nga adu ti naawatna a pangta ken insulto sipud nag-viral ti insidente iti social media.
Imbasa met ti abogado ti surat manipud iti vlogger a mangibagbaga a maladingitan unay ti klientena iti dakes nga epekto ti panang-video-na iti drayber ti pick-up ken ti pamilia daytoy.
Iti met biang ti drayber ti pick-up, insalaysayna bayat ti hearing a baybay-anna latta koma kanon ti insidente ngem nasdaaw ken napilitan a nangsango iti motovlogger idi nakitana nga inur-uray isuna ti grupo dagiti rider a kadua ti vlogger.
Idi a kinompronta ti vlogger, segun iti pick-up driver, naammuanna a babai gayam daytoy--ti komprontasion ket paset ti video nga impaskil kas content ti vlogger, a nag-viral iti social media. (Aaron Recuenco/MANILA BULLETIN)
