Masapul ti patas ken naibatay iti datos a wagas ti mangiwanwan kadagiti saritaan maipapan iti singasing a panangingato iti sueldo iti entero a pagilian tapno masalakniban ti pagimbagan dagiti mangmangged ken mataginayon ti kinatalged ti ekonomia, kinuna ti Department of Labour and Employment (DOLE).
Segun ken ni Sekretario ti DOLE Bienvenido Laguesma, indatagdan ti teknikal a report iti Kongreso ken impaganetgetda ti panagkasapulan iti napaut a panagsasarita iti nagbaetan dagiti mangmangged, employer, ken sektor ti gobierno iti baet ti kiddaw a ₱200 nga across-the-board increase iti inaldaw a minimum wage.
Kastoy met ti kinuna ni Presidente Ferdinand Marcos Jr. idi narambakan ti Labor Day, a dinagadagna ti natimbeng ken komprehensibo a panangrepaso kadagiti singasing maipapan iti sueldo tapno masigurado ti agpaut a benepisio a saan a makompromiso dagiti panggedan ken panagpuonan.
Inyebkas ti grupo dagiti negosiante ti pakaseknanda a dakes nga epekto ti uniform wage hike kadagiti micro, small, and medium enterprises (MSME), a mangbukel iti 99 a porsiento ti negosio iti entero a pagilian, a mabalin nga agbanag iti panangikkat iti mangmangged wenno nangatngato a presio.
PUV consolidation, linuktan manen ti DOTr
Impaganetget ni Laguesma a ti Regional Tripartite Wages and Productivity Boards (RTWPBs) ti addaan karbengan a mangikeddeng iti sueldo, a mangsukimat iti implasion, cost of living, ken ti kabaelan ti employer nga agbayad.
Kinuna ti Ibon Foundation a ti kinalinteg ti pagbatayan ti kiddaw para iti nangatngato a sueldo, a nangdakamat iti dumakdakkel a paggidiatan ti matgedan dagiti trabahador ken dagiti ganansia dagiti korporasion. Impaganetgetda a masapul a makaaguanta ti sueldo dagiti mangmangged iti umad-adu a gastos iti panagbiag.(Trixee Rosel/Manila Bulletin//Lito Hilidon/Bannawag)
