Impaganetget ti Department of Education (DepEd) idi Mayo 7 nga awan ti automatiko a makaruar wenno "auto-pass policy" kadagiti para iti publiko a pagadalan iti Filipinas, iti baet ti dumakdakkel a pakaseknan mainaig iti maar-aramid a "mass promotion"--a mabalin latta a pumasa dagiti estudiante uray saanda a naragpat dagiti pagalagadan ti eskuela.
Nupay kasta, inaklon ni Sekretario ti DepEd Sonny Angara nga adda dagiti gagangay nga ar-aramid ken panangpilit a mabalin a manggutigot kadagiti pagadalan ken mannursuso a mangipasa kadagiti estudiante iti sumaruno a grado uray ania pay ti nagapuananda.
Segun ken ni Angara, saan a pormal a paglintegan ti DepEd ti "mass promotion" ngem nagbalin daytoyen a gagangay kadagiti pagadalan, ket masapul a mabaliwan daytoy ta ti pannakaipasa wenno pannakaital-o ket maibatay iti aktual a pannakasursuro.
Inlawlawag ni Angara a no ti balligi ti school-level ket marukod babaen ti kaadu ti estudiante a pumasa, ken no dagiti mannursuro ket mariknada nga agpannuray dita ti evaluation ken promotion-da, saan ngarud a nakaskasdaaw no ti dayta ti pagturongan ti sistema. Innayon ni Angara a saan a biddut ti tao daytoy, no di ket ti sistema.
Kiko Pangilinan, ingganetgetna ti platapormana a seguridad iti taraon kadagiti botante iti Ilocos Sur
Kinuna ti DepEd a repasuenda ti polisiada iti assessment, remediation, ken promotion, tapno maipasdek iti nalawlawag nga academic standard, epektibo a remediation program ken patas a teacher evaluation system tapno masigurado a ti pannakaipasa dagiti esdudiante ket maibatay iti aktual a naadalda. (Merlina Hernando-Malipot/Manila Bulletin//Lito Hilidon/Bannawag)
