Kinemmeg dagiti autoridad idi Marso 7 ti dua nga Intsik gapu iti ikutda a mapapati a pagespia a ramit, iti maysa nga operasion iti Baliuag, Bulacan.
Naisayangkat ti operasion iti Primavera Homes iti Barangay Sabang, Baliuag gapu iti report ti posible a panagespia dagiti dua a ganggannaet babaen ti IMSI catcher, maysa a ramit a kabaelanna iti mang-intercept, mangidulin, ken mangusar iti impormasion a nakalapda manipud kadagiti ramit a para komunikasion.
Inlawlawag ni Police Maj. Gen. Nicolas Torre III, direktor ti Criminal Investigation and Detection Group (CIDG), a ti nasamsamda nga IMSI catcher ket napeggad ta mabalin daytoy nga ikompromiso ti privacy ti maysa a tao ken uray ti seguridad ti pagilian.
Kabaelan ti IMSI (international mobile subscriber identity) catcher a sapulen ken suroten dagiti amin a silulukat a mobile phone iti maysa a partikular a lugar.
Minority bloc ti Senado, ilungalongda ti pannakairugi ti impeachment trial iti plenario
Nasamsam ti CIDG ti antenna ti IMEI catcher, Huawei Wifi Internet Router, 3000W inverter, 1200 portable inverter, kasta met ti Toyota Fortuner a lugan dagiti Intsik.
Naipanen iti kostudia ti CIDG Bulacan Provincial Field Unit dagiti dua a suspek a naidarum iti kaso a pananglabsing iti Republic Act No. 10175, wenno ti Cybercrime Prevention Act of 2012. (Aaron Recuenco/Manila Bulletin//Lito Hilidon/Bannawag)
