Pinalubosan ti Commission on Elections (Comelec), ti panagpaay dagiti soldado a kas security escort ni Davao City 1st District Rep. Paolo Duterte, kinuna ti militar kalpasan ti panangibutaktak ti Philippine National Police (PNP) a dagiti uppat a bodyguard a nakita iti viral a video ket polis ken personnel ti Air Force.
Nupay kinompirmar ni PNP Chief Gen. Rommel Francisco Marbil nga agpapaay a kas bodyguard ni Duterte dagiti dua a polis, kinuna ti Armed Forces of the Philippines (AFP) a saan a kasta iti biang dagiti militar.
Iti maysa nga statement, kinompirmar ti AFP a pinalubosan ti Comelec ni Rep. Paolo Duterte nga agtalinaed ti security detail daytoy a buklen ti personnel ti AFP, kas maitunos kadagiti maipakat a pagalagadan iti panawen ti eleksion. Ngem kinuna ti AFP nga im-imbestigarenda daytoy a banag tapno mapalutpot ken mapatalgedan no asino dagiti natudingan a mangipaay iti seguridad ni Duterte.
Itay kallabes, inkari ni Marbil nga ikkatenna iti serbisio dagiti dua a polis a nairaman iti video kalpasan a natakuatanda a saan nga autorisado dagiti dua a polis nga agpaay a kas security personnel ti uray asino man.
Kiko Pangilinan, ingganetgetna ti platapormana a seguridad iti taraon kadagiti botante iti Ilocos Sur
Maikkat met iti serbisio ti commander dagiti dua a polis gapu iti panangpalsipikarna iti dokumento mainaig iti inaldaw a panangbilang kadagiti empleado. (Aaron Recuenco/Manila Bulletin//Lito Hilidon/Bannawag)
