Naikkaten iti serbisio ni Patrolman Francis Steve Fontillas, vlogger a polis a nag-viral dagiti video ken paskilna iti social media a mangdildillaw ken ni Presidente Ferdinand Marcos Jr. ken kadagiti nangangato nga opisial ti Philippine National Police (PNP) mainaig iti panangarestar ti International Criminal Court (ICC) ken ni dati a presidente Rodrigo Duterte.
Daytoy ti pangngeddeng ti National Police Commission (NAPOLCOM) kalpasan ti inwayatda nga en banc deliberations a nakaduktalan a nagbasol ni Fontillas iti grave misconduct, conduct unbecoming of a police officer, ken disloyalty to the government.
Unanimous wenno sangsangkamaysa dagiti commissioner ti NAPOLCOM iti desisionda kontra ken ni Fontillas.
Malaksid iti dismissal wenno pannakaikkatna iti serbisio, impaay pay ti NAPOLCOM En Banc ken ni Fontillas ti "accessory penalty of perpetual disqualification from public service."
Kiko Pangilinan, ingganetgetna ti platapormana a seguridad iti taraon kadagiti botante iti Ilocos Sur
Sakbayna, segun iti Quezon City Police District (QPCD) a pagpapaayan ni Fontillas, opisial a naglusulos daytoy iti PNP epektibo idi Abril 10 ket inaprobaran ti PNP ti panaglusulosna.
Kinuna met ni NAPOLCOM vice chairperson ken executive officer Atty. Rafael Vicente Calinisan a saan a gapu ta immunan a nag-resign ni Fontillas ket maawanen dagiti administratibo ken kriminal a kaso a naipila kontra kenkuana.
"Gapu ta pormal a naidarumen ni Fontillas iti NAPOLCOM sakbay ti panag-resign-na, addaanen ti NAPOLCOM iti hurisdiksion kenkuana Isut' gapuna nga uray ania ti kunkuna ni Fontillas, saanna a basta a malisian ti sungsungbatanna babaen ti panag-resign," innayon ni Calinisan.
