Iti sumagmamano laengen nga aldaw sakbay ti nasional nga eleksion, ad-adda ti panangiganetget ti kandidato a senador a ni Camille Villar para iti mental health awareness, nga ipalpalagipna daytoy kas napateg a paset ti salun-at ti publiko ken maysa kadagiti kangrunaan nga adbokasiana.
“It’s OK not to be OK,” kinuna ni Villar bayat ti panangparegtana kadagiti Filipino a mangbigbig ken mangtaming kadagiti pannakidangadang iti salun-at ti panagpanunot, nangruna iti sangsanguen nga umad-adda a personal ken propesional a pressures. "Mental health is health,” impaganetgetna.
Iti panagsaritana iti maysa a panagkampania, impaganetget ti milenial a kandidato ti pannakasapul iti silulukat a diskusion iti pakaseknan ti salun-at ti panagpanunot ken ti pannakaikkat ti stigma a nakapalikmut iti daytoy. “Pudpudno daytoy a pakaseknan a mangapektar kadagiti tattao iti amin nga edad. Maysa a banag a ditay' koma pagbainan,” kinuna ni Villar.
Indagadagna pay iti PhilHealth a palawaen daytoy ti masakupanna tapno mairaman ti komprehensibo a serbisio ti salun-at ti panagpanunot tapno nasaysayaat ti pannakasuportar dagiti indibidual nga agsapsapul iti pannakaagas ken pannakabalakad.
Saan a Marcos:' Romualdez, Araneta ti mangiturturay it gobierno --Imee Marcos
Kas panangbigbigna iti Mental Health Awareness Month ita a Mayo, pinatibker ni Villar ti mensahe a ti mental well-being ket napateg a kas iti physical health. “Ti salun-at ti panagpanunot ket maysa a kangrunaan a kasapulan. Tunggal Filipino, maikari a makagun-od iti umno a pannakaaywan ken pannakaawat,” kinunana.
Iti labes dagiti karina iti kampania, dinakamat ni Villar ti trabahona iti Kongreso, a nangipilaanna iti House Bill No. 10933, ti naigakat a “Teacher’s Mental Health and Wellness Act.” Panggep ti bill nga iinstitusionalisar dagiti sistema ti suporta para kadagiti edukador, a mangipamaysa iti sikolohikal ken emosional a pagimbaganda.
“Dagiti mannursurotayo ti mangsukog kadagiti kaputotan iti masakbayan.Ti panangsuportar iti salun-at ti panagpanunotda ket saan laeng a maipapan iti pagimbaganda, no di ket maipapan iti panangpasayaat iti sapasap a sistema ti edukasiontayo,” inlawlawag ni Villar.
Bayat ti panangleppasna iti kampaniana, agtultuloy nga itantandudo ni Villar ti ad-adda a mannakipagrikna ken responsable a gobierno a mangtaming kadagiti kasapulan ti salun-at ti panagpanunot ti tunggal Filipino. “Saanka nga agmaymaysa,” kinunana. “Addakami ditoy para iti tunggal maysa.”
