Opisial nga inyendorso ni dati a mayor ti Manila a ni Isko Moreno Domagoso ni kandidato a senador Camille Villar iti campaign rally a naangay iti Paco, Manila, a nangpabileg iti kandidatura daytoy sumagmamano nga aldaw sakbay ti eleksion nasional inton Mayo 12.
Naangay ti rally a nangitampok iti entero a lokal a tiket ni Moreno a naawagan iti "Yorme's Choice" a pakairamanan ni kandidato a bise mayor Chi Atienza, 5th District congressional aspirant Rep. Amado Bagatsing, ken ti kompleto a listaan dagiti mangnamnama nga agtugaw iti konseho ti siudad.
Kiniddaw ni Moreno kadagiti taga-Manila nga iramanda ni Villar iti listaanda iti 12 a senador, a dinayawna gapu iti panagkumitna a tumulong iti siudad ken gapu ta maysa met daytoy a taga-Manila.
"Mabalintayo kadi nga iraman iti sangapulo ket dua? Senadortayo ni Camille Villar!" indeklarar ni Moreno iti nasao a rally.
Kaaduan a Filipino, kayatda nga ipangpangruna ni Sara Duterte dagiti kasapulan ti pagilian, sanguenna dagiti kasona a panagkunniber -- SWS
Kas sungbat, inyebkas ni Villar ti panagyamanna iti pannakayendorsona ket inkumitna ti bagina nga agsapul kadagiti sungbat dagiti kangrunaan nga isyu a napateg kadagiti taga-Manila — pakairamanan ti suporta iti pagbiag para kadagiti babassit a negosio, panagpabalay, pannakagun-od ti pannakataripato ti salun-at, ken karbengan dagiti babbai ken katatao.
Kinunana met a ti ramut ti pamiliana ket ti Manila gapu ta naipasngay ken dimmakkel ti amana, ni dati a Senate President Manny Villar, iti Moriones, Tondo nga iti naminsan, naglaklako iti ikan iti Divisioria-- maysa a nanumo a nagtaudan a kunana a nangsukog kadagiti pagalagadan ken pannakipagriknana kadagiti mangmangged a Filipino.
Naggapu met ni Isko Moreno iti nanumo a kaamaan iti Tondo. Nabigbig iti transformative leadership-na a kas mayor ti Manila, nga iti panagpaayna, naitampok ti urban renewal ken pannakaidanon dagiti serbisio publiko kadagiti taga-Manila. Panggep ni Moreno ti agsubli iti puestona a pinanawanna tallo a tawenen ti napalabas.
Kinuna ni Villar nga ibinglayna ti sirmata ni Moreno ken ti grupona — panangisigurado a ti tunggal Manileño ket addaan iti desente a balay, dekalidad nga edukasion, mapagtalkan a pannakataripato ti salun-at, ken panggedan.
Dakkel ti maaramidan ti pannakayendorso ni Camille Villar iti Manila no panunoten ti kadakkel met ti impluensia ni Isko Moreno kadagiti taga-Manila ken iti napintas a naaramidanna idi isu pay ti mayor ti siudad.
