Saan pay a naipila ti Duterte Youth Party-list ti umuna nga impeachment complaint kontra ken ni Presidente Marcos iti Kamara idi Mayo 8 gapu iti kaawan ni Secretary General ti Kamara Reginald Velasco.
Idi malem ti Huebes Mayo 8, napan dagiti pannakabagi ti Duterte Youth Party-list a da Ronald Cardema ken ti asawana a ni Marie Cardema iti opisina ti secretary general ti Kamara tapno ipilada ti impeachment complaint a maibusor ken ni Presidente Marcos.
Ngem saanda a naipila daytoy gapu ta awan ni Velasco iti opisinana.
Inlawlawag ni House Speaker Martin Romualdez nga awan ti tao iti opisina ti secretary general ta saan a nakasesion ti Kamara, ken dimmar-ay iti maysa a seminar ti secretary general.
Saan a Marcos:' Romualdez, Araneta ti mangiturturay it gobierno --Imee Marcos
Nupay kasta, inyebkas ni Romualdez ti panagduaduana no maipasa ti nasao a complaint no bilang ta maipila iti Kamara.
Dinakamat ni Cardema a kas ground for impeachment ti pannakaarestar ni dati a presidente Rodrigo Duterte iti International Criminal Court (ICC) idi Marso. Impaganetgetda a saan a rumbeng nga isuko ti gobierno ti maysa a Filipino iti ganggannaet.
Segun ken ni Romualdez, agingga a saan a nayendorso, naipila, wenno naawat ti Kamara -- kangrunaan ti secretary general, maysa laeng a papel ti impeachment complaint.
Imparang ti Duterte Youth Party-list ti kaadda ti impeachment complaint uppat nga aldaw sakbay ti midterm election. (Ellson Quismorio/Manila Bulletin//Lito Hilidon/Bannawag)
