Inkari ni Camille Villar nga agbalin a timek dagiti babbai a Filipino iti Senado, a mangitandudo kadagiti annuroten a mangsalaknib ken mangpabileg kadakuada babaen ti komprehensibo a linteg.
Dua a termino a pannakabagi ti kakaisuna a distrito ti Las Piñas, sinurat ni Villar dagiti adu a gakat a nairanta a mangpasayaat iti healthcare, social services, ken legal protection para kadagiti babbai. Kalikagumanna ita ti tugaw iti Senado tapno ad-adda pay a mapapigsa dagitoy nga adbokasiana iti nasional nga agpang.
"Dagiti babbai ti sentro ti pannakaparang-ay ti pagilian. Dakkel ti panagraemko kadagiti Filipino iti amin nga edad ken nagtaudan. Mamatiak a ti panangsalaknib kadagiti karbenganda, panangisigurado iti pagimbaganda, ken panangitandudo iti pannakapabilegda ket maysa kadagiti addaan kaipapanan a kontribusion a mabalinko nga aramiden a kas maysa nga agserserbi iti publiko," kinuna ni Villar.
Mairaman kadagiti gakat nga impilana ti House Bill No. 10697, wenno ti Pregnant Women Welfare Act, a mangikagkagumaanan a mamagbalin a permanente dagiti nalaka a maibagay nga urnos ti trabaho—agraman dagiti work-from-home setups—para kadagiti masikog a babbai ken inna agingga iti makatawen kalpasan ti panagpasngayda.
Kaaduan a Filipino, kayatda nga ipangpangruna ni Sara Duterte dagiti kasapulan ti pagilian, sanguenna dagiti kasona a panagkunniber -- SWS
Inyam-ammona pay ti House Bill No. 10695, wenno ti Equal Maternity Protection Act, a mangpalawa kadagiti benepisio ti panagpasngay kadagiti trabahador iti impormal a sektor. Isingasing ti gakat ti maminsan a direct maternity cash benefit iti kada panagpasngay ken PhilHealth coverage para kadagiti babbai nga impormal a trabahador a saan a kameng ti Social Security System (SSS).
Tapno mataming ti maternal health ken child mortality, nangipila ni Villar iti House Bill No. 10694, a mangimandar iti pannakaiwaras dagiti maternity kits kadagiti nababa ti matgedanna a masikog. Inlabanna pay ti House Bill No. 5684 a mangikagkagumaanan a mangiparit kadagiti ospital, maternity clinics, ken dadduma pay a pasilidad ti salun-at nga agkedked a mang-admit wenno tumulong kadagiti masikog a babbai nga agpasngay.
Iti panangbigbigna iti kasasaad dagiti babbai nga agsagsagaba iti kinaranggas, pinanday ni Villar ti House Bill No. 5243, a mangipaay iti libre a medikal a benepisio ken pannakayospital kadagiti nakurapay a biktima ti pannakaabuso. Inyusuatna pay ti panangimbestigar ti Kongreso iti umad-adu a matmatay nga inna; iti kasta, maitandudo ti ad-adda pay a pannakagun-od ti pannakataripato ti salun-at ken dagiti pagalagadan a mangtaming iti isyu.
Ti panangikalikagumna iti pannakatagiben ti salun-at dagiti babbai ket dumanon agingga iti pannakaammo ken panangagas iti kanser. Babaen ti House Resolution No. 1023, indagadag ni Villar iti gobierno a palawaenna dagiti programa ti early detection ken pasayaatenna ti pannakagun-od kadagiti preventive breast cancer screenings. Isingasing pay ti resolusion ti pannakabukel ti special assistance fund a para kadagiti pasiente ti kanser, nangruna dagiti naggapu kadagiti nakurapay a pagtaengan.
"Pagrebbengan ti gobierno ti mangsalaknib iti pagsayaatan ti tunggal Filipino. Maysa daytoy kadagiti prioridadko iti Senado no maikkanak iti gundaway nga agserbi," kinuna ni Villar.
Kas maysa a lider a milenial, inyebkasna ti tarigagayna a mangyam-ammo kadagiti napapateg a pagalagadan a mangtaming kadagiti nabayagen a karit a sangsanguen dagiti babbai.
"Kayatko ti agbalin a timek dagiti babbai a Filipino iti Senado. Kas maysa a millennial leader, sikukumitak a mangitandudo kadagiti moderno, kabaruanan a solusion kadagiti agtultuloy nga isyu a mangap-apektar ita kadagiti babbai," innayonna.
