Kiddawen dagiti lima nga opisial ti gobierno iti Office of the Ombudsman (OMB) a maikkanda koma iti ad-adu pay nga oras a mangidatag iti counter affidavit, kas sungbat iti reklamo kontra kadakuada nga impila ni Senadora Imee Marcos gapu iti maipagarup nga illegal a pannakaarestar ni dati a presidente Rodrigo Duterte.
Daytoy ti kinuna ni Sekretario ti Department of Justice Jesus Crispin C. Remulla iti maysa nga interbiu ita nga aldaw, Mayo 9.
Segun ken ni Remulla, dagiti isyu a dinakamat ni Sen. Marcos iti impilana a reklamo ket maibilang a sub judice rule, ta adda sumagmamano a petision a naidatag iti Korte Suprema mainaig iti daytoy.
Kinuestionar dagiti tallo nga annak ni Duterte ti pannakaarestar ti amada idi Marso 11 ken ti pannakayallatiwna iti International Criminal Court (ICC). Ngem saan pay a naresolba ti Korte Suprema daytoy.
Saan a Marcos:' Romualdez, Araneta ti mangiturturay it gobierno --Imee Marcos
Impalagip ni Remulla a gapu iti sub judice rule, maiparit kadagiti partido ti maysa a kaso ti agsarita maipapan iti kaso a nakapila iti korte.
Malaksid ken ni Remulla, agidatag met iti counter affidavit da Secretary ti Department of the Interior and Local Government (DILG)Jonvic Remulla, Philippine National Police (PNP) Chief Gen. Rommel Marbil, PNP Criminal Investigation and Detection Group Chief Maj. Gen. Nicolas Torre III, ken ni Special Envoy for Transnational Crimes Markus Lacanilao.
Inakusaran ida ni Sen. Marcos iti kaso nga arbitrary detention segun iti Article 124 ti Revised Penal Code (RPC), usurpation of judicial functions, panangsalungasing iti Anti-Graft and Corrupt Practices Act, ken iti Republic Act No. 7438 a mangikeddeng kadagiti kalintegan ti naibalud a tao.
Naibatay ti reklamo iti resulta ti hearing ti Senate Committee on Foreign Relations nga idadauluan ni Sen. Marcos.
Inaksionan ti OMB ti reklamo ni Sen. Marcos ket binilinna dagiti lima nga opisial a mangidatag iti counter affidavit-da, saan a motion to dismiss, iti las-ud ti 10 nga aldaw. (Jeffrey Damicog/Manila Bulletin//Lito Hilidon/Bannawag)
