Agpannurayen ti masakbayan ti PrimeWater Infrastructure Corporation a kukua ti pamilia a Villar iti resulta ti maar-aramid nga imbestigasion iti mapapati a saanna a pannakaipaay iti umisu a serbisio, kinuna ti Malakanyang ita nga aldaw, Mayo 9.
Iti maysa a press briefing, kinuna ni Undersecretary ti Presidential Communications Office Claire Castro nga asidegen nga iruar ti Local Water Utilities Administration (LWUA) ti resulta ti panagimbestigarda iti maipagarup a naalas a serbisio ti PrimeWater.
Segun ken ni Castro, agarup 16 a milion a tattao ti naapektaran iti mapapati a saan a nasayaat a serbisio ti PrimeWater.
Idi Huebes (Mayo 8), impila ti Bayan Muna Party-list ken dagiti agus-usar iti PrimeWater ti pormal a reklamo iti Malakanyang, a kiniddawda ti pannakakanselar ti amin a joint venture agreements (JVA) iti nagbaetan ti PrimeWater ken dagiti local water district iti entero a pagilian, gapu iti nasaknap a di pannakaipaay iti serbisio ken panangsalungasing iti linteg.
Saan a Marcos:' Romualdez, Araneta ti mangiturturay it gobierno --Imee Marcos
Maibatay iti naipila a reklamo, ti JVA ti nangitunda iti masansan a pannakaawan ti danum, saan a napintas a kalidad ti danum, nangina a bayad, saan nga agresponde a customer service kadagiti lugar kas iti San Jose del Monte iti Bulacan, Bacolod City, ken dagiti probinsia ti Quezon, Cavite, ken Bukidnon.
Urayen pay ti gobierno ti resulta ti panagimbestigar ti LWUA sakbay a mangipaay iti pangngeddeng.
Sakbay daytoy, nangipila ti Makabayan bloc iti resolusion iti Kamara nga agkidkiddaw iti pannakaimbestigar ti JVA ti PrimeWater ken dagiti nasurok a 130 a local water district iti entero a pagilian. (Ruth Abbey Gita-Carlos/PNA//Lito Hilidon/Bannawag)
