Impalgak ti kabsat ni Papa Leo XIV a binuya ti kabbotos a papa ti nainominar iti Oscars a pelikula a "Conclave" a nagbidaan ni Ralph Fiennes, sakbay ti pannakaangay ti pudpudno a conclave iti Vatican.
Segun iti in-inauna a kabsat a lalaki ti papa, iti maysa nga eksklusibo nga interbiu iti NBC idiay Chicago, U.S.A., imbaga ti papa ti nasao a panangbuyana iti pelikula iti naudi a panagsaritada sakbay ti pannakabotos daytoy iti kinapapa.
Mabasa iti maysa a paset ti artikulo: "Dinamag ni Prevost iti kabsatna no nabuyan daytoy ti pelikula a 'Conclave' sakbay ti rugi ti papal conclave tapno 'ammona ti ar-aramidenna' ket kinuna met ni Papa Leo a nabuyanan."
"Isu nga ammona ti inar-aramidna. Ngarud, kasdiay gayam (ti conclave), ta kayatko a dina unay ipapati koma, yaleng-alengna koma lattan, agsipud ta maysa daytoyen a nakadakdakkel a responsibilidad," kinuna ti kabsat ti papa.
Camille Villar, inyendorso ni Mayor Biazon ti Muntinlupa
Maysa a drama a pelikula ti "Conclave" a nainominar iti walo a kategoria--best picture, best actor, best supporting actress, best costume design, best adapted screenplay, best production design, best film editing, ken best original score--iti maika-97 nga Academy Awards. Nangabak iti best adapted screenplay.
Impadamag ti NBC a maysa a natured a pannakaadaptar ti pelikula iti 2016 international best-selling thriller a libro ni Robert Harris. Maipapan daytoy iti tradision ti Katoliko a papal conclave, wenno ti panagtataripnong dagiti kardinal iti ikub dagiti nalimed a pader ti Vatican tapno pilienda ti baro nga Obispo ti Roma, a pagaammo met kas Papa. Ket gapu ta ti ipapatay ti naipatpateg a maudi a papa ket nairaman iti misterio ken mapapati a panangliput, napnuan drama ken pikapik ti pelikula a "Conclave."
Kinuna ti in-inauna a kabsat ti papa nga addaan iti "sangkabassit a pannakarikna" nga agbalin ti kabsatna nga umuna nga Amerikano a papa.
Segun pay iti kabsat ti papa, mapanda a sangapamilia idiay Roma inton Biernes (Mayo 9) tapno makitada ti baro a papa, nupay dida masigurado no mapasamak dayta.
"Diak ammo no kasano kalakana a makaasideg kenkuana. Ken no palubosanda ngata a maasitgan isuna? Diak la ammo," kinunana.
Ti in-inauna a kabsat ti papa ket napaut ti karerana iti edukasion, umuna kas mannursuro iti Visitation Catholic High School sakbay a nagpaay iti 27 a tawen a kas prinsipal kadagiti lokal a Katoliko a hayskul. (Robert Requintina/MANILA BULLETIN)
