"Cheap ken desperado a publicity stunt."
Kasta ti panangiladawan ni La Union 1st district Rep. Paolo Ortega iti panagpanggep ti Duterte Youth Party-List a mangipila iti kaunaan nga impeachment complaint iti Kamara kontra ken ni Presidente Ferdinand Marcos Jr.
“Awan pay met ngarud pormal a reklamo, inusardan daytoy tapno agpalastogda iti media,” kinuna ni Ortega iti statement-na ita a Biernes, Mayo 9, maysa nga aldaw kalpasan a ginandat da agassawa a Ronald Cardema ken Marie Cardema, ngem napaayda, a mangipila iti complaint ken ni House Secretary General Reginald Velasco.
“Nakalawlawag a saan a maipapan daytoy iti hustisia no di ket maipapan iti clout. Personal a salaknibak ti Presidente manipud iti daytoy awan nakaibatayanna ken malisioso a panangatakar,” indeklarar ti Ilokano a House deputy majority leader.
Saan a Marcos:' Romualdez, Araneta ti mangiturturay it gobierno --Imee Marcos
“Dayta a makunkuna nga impeachment complaint, maysa laeng a political gimmick, a nairanta a mangburibor iti publiko iti pudpudno a a sayangkat iti nation-building babaen ti panangidaulo ni Presidente Marcos,” kinuna ni Ortega.
Awan ni Velasco idi napan iti Kamara dagiti agassawa a Cardema a mangibagbagi iti Duterte Youth Party-list. Isut' gapuna a saan a naipila ti impeachment complaint.
Inwayat ti nasao a party-list ti petisionna a panangpatapuak kontra ken ni Marcos uppat laengen nga aldaw sakbay ti pannakaisayangkat ti mid-term elections.
Innayon ni Ortega a dakkel ti rimmang-ayan ti administrasion ni Marcos iti economic recovery, impraestruktura, agrikultura, ken programa ti kagimongan--dagiti nagun-odan a rumbeng a masalakniban, saan a madadael babaen kadagiti political stunt.
“Idiay La Union ken iti entero a pagilian, makitatayo ti resulta ti good governance babaen ken ni PBBM. Saantayo nga ipalubos dagiti attention-seeker a mang-hijack iti national agenda para iti bukodda a managimbubukod nga ambision,” impaganetget ni Ortega.
“Saantayo nga ipalubos dadaelen ti dakes a politika ti imbag nga bangbangonentayo. Maikari ti umili a Filipino iti nasaysayaat,” innayonna. (Ellson Quismorio/MANILA BULLETIN)
