Ni Robert Francis Prevost, 69, maysa a misionero a nangbusbos iti karerana iti panangiwanwan iti Peru ken nangidaulo iti Office of Bishops ti Vatican, ti napili nga umuna a papa manipud iti Estados Unidos iti 2,000 a tawen ti Iglesia Katolika.
"Leo XIV" ti nagan nga innala ni Prevost, a maysa nga Augustiniano a padi.
Iti umuna a mensahena kas kasukat ni Papa Francis, manipud iti loggia ti St. Peter's Basilica, kinunana: "Kappia koma ti adda kadakayo," ken impaganetgetna ti mensahe ti kappia, panagsasarita, ken mision a panangikasaba iti ebanghelio.
Inkawesna ti tradisional a nalabaga a kapa ti kinapapa--banag a saan nga inaramid ni Francis kalpasan ti pannakapilina idi 2013.
Maysa ni Prevost kadagiti kangrunaan a kandidato iti kinapapa, ngem saan a nagbalin gapu iti nabayagen a mapapati a "pannakaiparit" ti papa nga aggapu iti US gapu iti geopolitikal a bileg daytoy kas makuna a "superpower" a nasion, a nausar iti sekular a tay-ak. Ngem ni Prevost, a tubo ti Chicago, ti nagparang a maitutop gapu ta maysa met nga umili ti Peru ken nagnaed sadiay iti adu a tawen, umuna a kas misionero sa kalpasanna, kas arsobispo.
Singasing nga online voting iti Senado, saan nga anamongan ni Presidente Marcos
Innala ni Papa Francis ni Prevost iti Vatican idi 2023 tapno agpaay a kas nabileg a daulo ti opisina a mangpilpili kadagiti agbalin nga obispo iti entero a lubong, maysa kadagiti kapatgan a trabaho iti Iglesa Katolika. Idi Enero, naital-o ni Prevost kas cardinal bishop, a senior rank dagiti kardinal. Gapu iti daytoy, adun ti makaam-ammo ken ni Prevost idi simrek iti conclave, a maysa a bentahe nga awan kadagiti dadduma a kardinal.
Ni Leo XIII, ti naudi a papa a nangusar iti nagan a Leo, a maysa nga Italiano a nangidaulo iti Iglesia Katolika manipud 1878 agingga iti 1903. Daytoy a Leo ti nangpalukay iti panangsupiat ti Simbaan iti kinamoderno, nangruna iti siensia ken politika, ken nangipasdek iti pundasion ti moderno a kapanunotan ti Katoliko mainaig iti gimong, a kalatakan kadagitoy ket ti encyclical a Rerum Novarum nga impaulogna idi 1891, a nangtaming iti kalintegan dagiti mangmangged ken iti kapitalismo.(Associated Press/Manila Bulletin//Lito Hilidon)
