Ar-aramiden ita ti gobierno ti Filipinas ti napaut a polisia tapno masalakniban ti kinasoberano ti pagilian iti baet ti kuna dagiti opisial iti seguridad a di nainkalintegan, nalabes, ken nasaknap a panangtagtagikua ti China iti teritoriona, militarisasion, ken panangsaranget kadagiti kaarrubana a pagilian.
Iti taripnong a napauluan iti “Scarborough Shoal: Facing Facts and Exploring Options," kinuna ni National Security Adviser ken Director General ti National Security Council (NSC) Eduardo Año a paset ti panangbukel iti agpaut a polisia tapno masigurado a maipatungpal daytoy uray asinonto pay ti agtakem iti Malakanyang.
Imbutaktak ni SeaLight Director Ray Powell iti nasao a taripnong ti natakuatanda nga agsaksaknap ti panangkontrol ti China iti Scarborough Shoal, a namindua iti napalabas a 12 a bulan, ket agtultuloy latta ti panagtignayda nga agpadaya.
Imparang ni Powell dagiti ladawan nga ala ti satellite a mangipakpakita iti agtultuloy a panangdadael ti China iti Scarborough Shoal babaen ti panagala ti China kadagiti giant clam, a makadadael a wagas ti panangala iti rekurso kadagiti baknad.
ICC Prosecutors, nabilin nga agkomento iti isyu ti hurisdiksion iti kaso ni Duterte
Innayon ni Powell nga agul-ulbod ti China iti panangtingitingna mainaig iti pudno a kasasaad ti Scarborough Shoal a nairuar iti 2024. (Aaron Recuenco/Manila Bulletin//Lito Hilidon/Bannawag)
