Binilin ti Pre-Trial Chamber I (PTC-1) ti International Criminal Court (ICC) dagiti prosecutor a mangidatag iti komentoda iti panangkuestionar ti defense team ni dati a presidente Rodrigo Duterte iti hurisdiksion ti korte iti kaso.
Iti dokumento a nairuar idi Mayo 7, kinuna ti PTC-1 a masapul a mangidatag ti prosecution ken ti OPCV (Office of Public Counsel for Victims) iti naisurat a paliiwda iti panangkarit ti depensa iti hurisdiksion ti ICC, iti di naladladaw ngem Hunio 9.
Nagbilin pay ti PTC nga ikkan ti Victims Participation and Reparations Section (VPRS) ti OPCV iti kasapulan nga impormasion maipapan kadagiti biktima a nakiuman iti ICC mainaig iti kaso ken dagiti kasapulan a tulong tapno makontak dagiti biktima.
Idi Mayo 1, indatag da Nicholas Kaufman ken Dov Jacobs, abogado ni Duterte, ti dokumento a mangkueskuestionar iti legal a pagbatayan ti panangbista iti kaso ni Duterte. Kiniddawda pay a mawaswas ti kaso ni Duterte ken mawayaan koma daytoy ta immikkaten ti Filipinas iti ICC idi naimbestigaran ti kaso.
Defense system nga agpannuray iti bukod a kabaelan, buklen ti Filipinas
Nupay kasta, maikontra daytoy iti immuna a pangngeddeng ti ICC nga adda hurisdiksionna kadagiti krimen a naaramid iti Filipinas idi kameng pay daytoy ti ICC manipud Nobiembre 1, 2011 agingga iti Marso 16, 2019.
Naikeddeng ti confirmation of charges hearing ni Duterte inton Septiembre 23. (Raymund Antonio/Manila Bulletin//Lito Hilidon/Bannawag)
