Napagtalinaed dagiti mannalon ti kape iti Ilocos Sur ti nangato a kalidad dagiti binukel ti kape nga apitda itoy a tawen. Daytoy ket kalpasan a binagi ti Team Ilocos Sur ti umuna agingga iti maikapat a puesto iti Philippine Coffee Expo 2025 Small Scale Farmers-Robusta Category. Naangay ti pannakapadayawda idi Mayo 9, 2025 iti Ayala Mall, Makati City.
Inyalat da Krystel Anne Lames, Rowela Lames, Joemar Abaoag ken Mabini Ubuan ti umuna agingga iti maikapat a puesto, kas panagsasaganadda; idinto a nagpuesto pay da Dexter Daplayan, maika-8; ken Marieta Lidem, maika-10. Agpapada dagitoy a naggapu iti ili a Sigay, ti maibilang a coffee capital ti probinsia ken kangrunaan a pagang-angkatan iti kape a rubosta para iti One Ilocos Sur Café.
Mairaman dagiti nangabak nga apitda kadagiti mai-live auction itoy a Mayo 10. No kayatyo a ramanan ti kape ti Ilocos Sur, saraken ti Booth S-05 ti Team Ilocos Sur iti madama a Philippine Coffee Expo 2025 iti One Ayala, Makati. Agingga iti Mayo 11, 2025 ti nasao nga expo. (Mancielito S. Tacadena)
