Impeksa ti Commission on Human Rights (CHR) ti sibubukel a panangsuportarda iti singasing a linteg a mangipaay iti burial assistance ken libre a serbisio ti puneraria kadagiti marigrigat a pamilia.
Panggep ti Senate Bill (SB) No. 879, wenno ti Burial Assistance Act of 2022, nga ikkan iti tulong a pinansial para iti pannakaitabon dagiti bangkay a saan a mairuar ken ti pamiliada a marigrigat.
Iti sabali a bangir, ti singasing nga SB No. 1695 wenno ti Free Funeral Services Act, siguraduenna a dagiti pamilia nga agsagsagaba iti pinansial a pakarikutan ket maipaayan iti nadayaw ken manangaasi a suporta kabayatan ti panagladingitda.
Impaganetget ti CHR ti panangsuportarda iti pannakaipaulog dagitoy a gakat. Nupay bigbigenda nga addan dagiti local government unit a mangipapaay kadagiti kastoy a tulong, patien ti CHR a masapul ti nailian a linteg tapno mapunnuan dagiti giwang iti pannakaipaay iti nadayaw ken umdas a serbisio para iti pimmusay a kameng ti marigrigat a pamilia. (Czarina Nicole Ong Ki/Manila Bulletin//Lito Hilidon/Bannawag)
