Inarestar ti National Bureau of Investigation (NBI) ti innem a tao nga agkunkuna a kabaelanda a manipularen ti resulta ti May 12 election, babaen ti entrapment operation a naisayangkat iti Quezon City.
Imparang ni NBI Director Jaime B. Santiago iti media idi Mayo 9 dagiti nakemmeg a suspek a nabigbig a da Roland B. Ucab, Teody A. Abalos, Joseph G. Ong, Cherrylyn U. Adriano, Ralp Edward D. Salas, ken Francis James L. Mapua.
Segun ken ni Santiago, nakemmeg dagiti suspek iti entrapment operation nga insayangkat dagiti kameng ti NBI Special Task Force (NBI-STF) idi Mayo 8 iti maysa a hotel iti Quezon City, a nangawatan dagiti suspek iti marked money.
Naisayangkat ti operasion gapu iti reklamo ni Atty. Genaro N. Montefalcon, agngayangay a mayor ti Iba, Zambales a kinasarita dagiti suspek idi napan a bulan.
Defense system nga agpannuray iti bukod a kabaelan, buklen ti Filipinas
Segun iti NBI, nagpabigbig dagiti suspek nga adda koneksionda iti Commission on Elections ket indiayada ken ni Montefalcon a pangabakenda inton Mayo 12 babaen ti panangmanipularda iti Automated Counting Machines, ket ₱30 a milion ti siningirda.
Maysa kadagit suspek ti nagpabigbig nga adda koneksionna iti dati a Comelec chairman, ken nagpabigbig pay nga apoko ni dati a Comelec chairman Benjamin Abalos.
Maidarum dagiti suspek iti kaso nga estafa maibatay iti Article 315 ti Revised Penal Code (RPC), usurpation of authority babaen ti Article 177 ti RPC, ken pananglabsing iti Section 28 of Republic Act No. 9369, wenno ti Automated Election System Law. (Jeffrey Damicog/Manila Bulletin//Lito Hilidon/Bannawag)
