'Layus' a botos ti nangital-o iti dati a mayor ti Dupax del Norte, Nueva Vizcaya a ni Timothy Joseph Cayton a kas baro a lone district representative ti Nueva Vizcaya iti Kongreso, idinto a nangabak manen da incumbent a Gobernador Jose Gambito ken Bise Gobernador Eufemia Ang-Dacayo, iti pannakagun-odda iti dakkel nga electoral votes iti panagtarigagayda para iti baro a mandato kalpasan ti 2025 National and Local Elections iti probinsia.
Improklamar ti Provincial Board of Canvassers idi Mayo 13 da Congressman-elect Cayton nga addaan iti 100,291 a botos; Gobernador Gambito, 151,517 a botos; ken Bise Gobernador Ang-Dacayo, 96,129 a botos.
Improklamar met ti PBOC dagiti baro a nabotosan a kameng ti Sangguniang Panlalawigan iti South District a da Luisa Corazon Cuaresma nga addaan iti 49,958 a botos; Clem Cadoy, 41,625 a botos; Leah Tidang, 42,977 a botos; Emerlene Jane Galanta-Martinez, 36,244 a botos; ken Pablo Kindot, 4,891 ti botos.
Dagiti kameng ti Sangguniang Panlalawigan iti North District, da Eunice Galima-Gambol nga addaan iti 70,999 a botos; Atty. John Severino Bagasao, 56,175 a botos; Atty. Primo Percival Marcos, 51,734 a botos; Wilson Salas, 45,830 a botos; ken Flodemonte Gerdan, 44,611 a botos.
Gobernador, bise gobernador ti Pangasinan, nailayon
Kinuna ni Cayton, a kadua ni Dacayo iti AKSYON Party, a nalapunos iti napalaus a suporta dagiti Novo Vizcayano ket impaganetgetna nga agtrabaho a sipipinget a buyogan ti dedikasion tapno matungpal dagiti panggepna para iti panagdur-as ti turismo ken Indigenous People’s Cultural Preservation, ken dadduma pay. Kasta met nga iwayatna dagiti top legislative proposal a mangipamaysa iti sumagmamano nga amendments iti Local Government Code of 1991.
“Ti inaramidmi iti Dupax del Norte ket maaramid met iti sibubukel a probinsia babaen ti panagkaykaysatayo iti politika, lokal a liderato ken panagturay. Dawatek ti kararagyo ken tulong tapno matungpal ti sirmatatayo para iti Brand New Nueva Vizcaya,” kinuna pay ni Cayton.
Indaydayaw dagiti taga-Dupax del Norte ken dagiti kabangibang nga ili ti nagapuanan ni Cayton a kas dati a mayor ti Dupax del Norte a lokalisasion dagiti programa ti gobierno nasional ken pannakaiwaras dagiti nadumaduma a serbisio sosial ken tulong a nagbenepisiaran ti amin a sektor ti ili.
Ti napigsa a lehislatibo a suporta dagiti kameng ti Sangguniang Bayan iti ili ket naballigi a nainstitusional ken nangyeg iti tulong pinansial iti ruangan dagiti nadumaduma a sektor.
Iti biangna, kinuna ni Gobernador Gambito a dina ninamnama a mangabak ti landslide vote.
Inggunamgunam ni Gambito ti panagkumitna manen nga ad-adda pay nga agtrabaho para iti baro a mandatona, nga impaganetgetna a nupay natalna a tinawidna ti puesto manipud ken ni pimmusay a Gobernador Carlos M. Padilla, panggepna nga ad-adda pay a paneknekanna ita ta direkta a binotosan dagiti umili.
“Ipasiguradok kadagiti umili ti Nueva Vizcaya nga ad-adda pay nga agtrabahoak ita ta intalekyo kaniak ti kinagobernador. Agmaymaysatayo iti panangbangon manipud kadagiti nagapuanantayo ken reggetantayo ti dakdakkel pay a panagrang-ay,” innayonna.
Kiniddaw met ni Gambito ti panagkaykaysa, saan laeng a kadagiti dati a karibalna iti politika no di ket kadagiti amin a Novo Vizcayano, a kunana a panagkaykaysa ti tulbek ti naparpardas a panagrang-ay para iti probinsia.
Impeksa met ni Vice Governor Dacayo ti panagyamanna kadagiti Novo Vizcayano gapu iti aglaplapusanan a botos a naawatna. Inkarina nga isublina ti panagtalek dagiti Novo Vizcayano kadakuada babaen ti kinagaget, dedikasion, panagkumit, ken panagayat.
“Suportaranmi ti panagkaykaysa ti politika kas pundasion ti namnama iti panagdur-as ken panagrang-ay para iti Nueva Vizcaya,” kinunana. (BME/PIA Nueva Vizcaya, Capitol News Hub, Jared Production)
