Dakkel ti namnama dagiti umili ti Ilocos Norte iti pannakaipaay dagiti napapateg a proyekto ti gobierno gapu ta agtultuloy ti panagturay dagiti kandidato a supsuportaran ni Presidente Ferdinand Marcos Jr. kadagiti kangatuan a pagtakeman iti probinsia.
Kas agpada a kameng ti pamilia a Marcos, manamnama ti direkta a linia iti presidente dagiti nabotosan a gobernador ken bise gobernador a da Cecilia Araneta-Marcos ken Matthew Joseph Manotoc, kas panagsaganadda, no agkiddawda kadagiti proyekto a nairanta a pakabenepisiaran ti probinsia.
Ni Araneta-Marcos ket balo ti dati a bokal a ni Mariano Marcos II, a kasinsin ti presidente, idinto a ni Manotoc ket kaanakanna.
Supsuportaran met dagiti nailayon a kongresman ti Ilocos Norte a da Ferdinand Alexander Marcos (1st District) ken Angelo Marcos Barba (2nd District) da Araneta-Marcos ken Manotoc.
Kalpasan ti tallo a dekada, baro a mayor ti Ballesteros, Cagayan, nabotosan
Iti panagyaman ti 69-anios a gobernadora iti ayat ken suporta dagiti botante nga Ilokano, inkarina nga itultuloyna ti good governance ken dagiti napipintas a programa nga imbati ni Manotoc, a dati a gobernador.
"Mangrugi itan ti panagtrabaho para iti pagsayaatan ti probinsiatayo," kinuna ni Araneta-Marcos iti ababa a bitlana kalpasan nga improklamar ti Commission on Elections (Comelec) isuna kas baro a gobernador ti probinsia, nga addaan iti 299,037 a botos, idi malem ti Martes, Mayo 13.
Nagsinnukat iti posision da Manotoc ken Araneta-Marcos para iti 2025 midterm elections ket impilada dagiti certificate of candidacy-da (COC) idi Oktubre 8, 2024, ti deadline ti panagipila iti COC.
Awan ti nakalaban ni Manotoc idinto a maysa nga independent candidate a ni Arlene Jocelyn Butay, residente iti ili ti San Nicolas, ti nakasalisal ni Araneta-Marcos.
Kabayatan ti panagkampaniada, agpada nga inkarida nga amin a proyekto ken programa ti gobierno probinsial iti termino ni Manotoc ket saan nga agbaliw iti sumaruno a tallo a tawen.
"Nangato ti pananginanama ti kaaduan isu masapul nga ipaaytayo. Ania man ti politika ti maysa ken maysa, namnamaentayo a matungpaltayo amin a naikaritayo," kinuna ni Manotoc iti ababa a bitlana kalpasan ti proklamasionna.
Inkari met ni Bryan Alcid, ti baro a mayor ti Siudad ti Laoag ken maysa pay a nangabak a kandidato a kaaliado dagiti Marcos, nga idauluanna dagiti constituent-na iti panagprogreso.
Inabak ni Alcid ti agdama a mayor a ni Michael Marcos Keon, a kasinsin ti presidente.
Iti panagleppas ti eleksion, kiniddaw ni Alcid kadagiti amin a taga-Laoag a makipagtrabahoda iti administrasionna para iti napimpintas a masakbayan.
Bayat ti panawen ti kampania, inkari ni Alcid a mangipaay iti madagdagus a tulong kadagiti agkasapulan, mangparang-ay iti lokal a panagdur-as ti ekonomia, ken mangpataud iti panagdur-as ti komunidad babaen ti aktibo a pannakipaset ken mapangnamnamaan a serbisio publiko.
Inkari pay ni Alcid a pasayaatenna ti kinatalged ti publiko, itandudona ti turismo, ken suportaranna dagiti gannuat ti edukasion para kadagiti agtutubo, ken dadduma pay. (Leilanie Adriano/Philippine News Agency)
