Addan kabarbaro a mayor ti ili ti Ballesteros, Cagayan kalpasan ti aganay a 33 a tawen a panagturay ti maymaysa a pamilia iti munisipio, iti panangiproklamar idi rabii ti Lunes, Mayo 12, ti Municipal Board of Canvassers ken ni Dr. Robert Ogalino.
Babaen ti naalana a 9,376 a botos, inabak ni Ogalino ti incumbent a bise mayor ken nabayag a nagtaktakem a mayor a ni Violeta V. Unite, a nakaala iti 8,895 a botos. Nangabak ketdi a kas bise mayor ti agdama a mayor ken asawa ni Violeta a ni Vincent G. Unite, a nakaala iti 11,155 a botos.
Kadagiti napalabas a tawtawen, pagsinsinnublatan dagiti agassawa nga Unite ti kinamayor ken kinabise mayor ti Ballesteros.
Iti ababa a bitnana kalpasan ti pannakaiproklamarna, impeksa ni Ogalino ti nalaus a panagyamanna kadagiti nagtalek kenkuana ket inkarina a pagserbianna dagiti umili ti Ballesteros iti amin a kabaelanna, ania man ti politikal a nakaikamenganda.
Kaaliado ni Presidente Marcos, nangdominar iti eleksion iti Ilocos Norte
Kiniddawna met iti amin, pakairamanan dagiti kabalubalna iti politika, ti panagkaykaysa, a lipaten pay laeng ti pinnolitika ket agtitinnulong ti amin para iti pagsayaatan dagiti umili ken ti ili. (RVA/BANNAWAG News Team)
