Naiproklamaren dagiti nangabak a lokal a kandidato iti Santa Teresita, Cagayan iti eleksion kalpasan a nabilang amin dagiti botos iti 19 a presinto a pagbotosan idi rabii ti Mayo 12, 2025.
Improklamar ti Commission on Elections (COMELEC) ti Santa Teresita dagiti nangabak a mayor, bise mayor ken dagiti kameng ti Sangguniang Bayan idi Mayo 13, 2025.
Idauluan ni reeleksionista a mayor (para iti maikatlo a termino) Atty. Rodrigo "Rambo" De Gracia dagiti naiproklamar, babaen kada COMELEC Chairperson Larry A. Legamia, Vice Chairperson Analyn B. Valdez ken Member-Secretary Jose P. Acorda. Nakaala ni De Gracia iti 7,446 a botos. Nakaala met ti nakasalisalna a para mayor a ni Desiree Garcia-Dinulong iti 2,984 a botos.
Ni met Ruben P. Fagela Sr. ti nangabak a bise mayor, babaen ti 5,729 a botosna. Nakalabanna ni Ronel Foronda a nakaala iti 4,606 a botos.
Gobernador, bise gobernador ti Pangasinan, nailayon
Dagiti sumaganad dagiti walo a kameng Sangguniang Bayan a nangabak ken naiproklamar: Bobsy Puyaoan, 6,974 a botos; Berting Tabieros, 6,654; Rhudel Castillo, 6,382; Orlando Bareng Jr., 6,255; Jeff Javier, 6,217; Jovey Eduria, 5,770; Jethro Tibuc, 5,490; ken Joe Gonzaga, 5,482. (Edison B. Tobias)
