Inawat da dati a senador Leila de Lima ken human rights lawyer Chel Diokno ti diaya nga agbalinda a paset ti prosecution panel ti Kamara iti impeachment trial kontra ken ni Bise Presidente Sara Duterte.
“Inawisnak ti House Speaker nga agserbi iti prosecution panel para iti umay nga impeachment proceedings kontra ken ni Vice President Sara Duterte. Inawatko,” kinuna ni De Lima iti maysa nga statement idi Mayo 14. Agtugaw ni De Lima a pannakabagi iti House of Representatives ti Mamamayang Liberal (ML) Party-list kas first nominee daytoy.
Pannakabagi met ni Diokno ti Akbayan Party-list, makikadua met iti House prosecution panel.
“Situtured nga awaten ti Akbayan ti baro a paset ti pannakilaban para iti hustisia ken accountability,” kinuna ti Akbayan Party-list, nga addaan iti kangatuan a bilang ti botos a party-list iti kalkalpas a 2025 midterm elections.
Presidente Marcos, saanna a biangan ti impeachment trial ni Sara Duterte
Agpada a kaaliado da De Lima ken Diokno ti makunkuna a pudpudno nga oposision. Agpadada a nagkandidato a senador iti eleksion idi 2022 iti grupo ni dati a bise presidente Leni Robredo.
"Nagtaud ti pangngeddengko iti lugar ti pagrebbengan ken prinsipio. Patinayon nga nagtaktakderak para iti kinapudno, accountability, ken rule of law--iti nadumaduma nga administrasion, ania man ti politikal nga affiliation. Sitatalinaed a di nagbaliw dayta a panagkumitko," innayon ni De Lima.
Inlawlawag ti dati a senador, a naibalud iti pito a tawen gapu kadagiti sinsinan a kaso ti droga nga indas-al kenkuana ti administrasion ni dati a presidente Rodrigo Duterte, a ti desisionna ket “saan a maipapan kadagiti personalidad wenno partisan politics.”
“Maipapan dayta iti panangpadayaw iti panagtalek ti publiko ken dagiti responsibilidad a kakuykuyog dayta. Ti partisipasionko, maysa a paset ti nalawlawa nga agenda para iti Hustisia ken Reporma--maysa nga agenda a panggepko a naan-anay a suroten bayat nga alaek ti lugarko iti Kamara dagiti Pannakabagi,” kinunana.
Ni De Lima ti dati a pangulo ti Commission on Human Rights (CHR) ken dati a sekretario ti Departament of Justice (DOJ).
Kadua da De Lima ken Diokno iti prosecution team da Batangas Rep. Gerville Luistro, San Juan Rep. Ysabel Maria Zamora, 4Ps Party-list Rep. Marcelino Libanan, ken 1-Rider Party-list Rep. Ramon Rodrigo Gutierrez.
Naituding a rugian ti Senado, nga agpaay a kas impeachment court, ti impeachment proceedings kontra ken ni Sara Duterte inton Hulio.
In-impeach ti Kamara ni Duterte idi Pebrero 5. Naipatulod ti Articles of Impeachment iti Senado iti isu met laeng nga aldaw, ngem nag-recess ti Senado a dida tinaming ti isyu.
Iti beripikado a reklamo a naipatulod iti Senado, adda pito nga Articles of Impeachment a naipila kontra iti bise presidente: (1) panangliput iti panagtalek ti publiko gapu iti pangta ti asasinasion kontra ken ni Presidente Marcos, ti asawana, ken ti House Speaker; (2) panangliput iti panagtalek ti publiko ken panagkusit ken korapsion gapu iti di umisu a pannakausar ti pondo ti publiko; (3) panangliput iti panagtalek ti publiko ken panagpasuksok iti uneg ti Department of Education (DepEd); (4) panaglabsing iti Konstitusion ken panangliput ti panagtalek ti publiko gapu iti saan a mailawlawag a kinabaknang; (5) pannakaaramid ti high crimes gapu iti pannakairaman kadagiti extrajudicial killing; (6) panangliput iti panagtalek ti publiko gapu kadagiti mapapati a destabilization plot; ken (7) panangliput iti panagtalek ti publiko gapu iti saan a maitutop a kababalin a kas Bise Presidente. (Raymund Antonio/MANILA BULLETIN)
