Binukel ti Filipinas ken Germany ti tulag ti panagtinnulong iti depensa, bayat nga inlungalong ni Presidente Ferdinand Marcos Jr. ti naan-anay a pannakapatibker ti singgalut ti dua a pagilian, nangruna iti agdama a kasasaad iti West Philippine Sea (WPS).
Pinirmaan da Sekretario ti Department of Defense Gilberto Teodoro ken Defense Minister ti Germany Boris Pistorius ti tulag iti Berlin idi Mayo 14.
Naibatay ti tulag iti 1974 Administrative Agreement mainaig iti panagsanay dagiti kameng ti Armed Forces of the Philippines (AFP) iti Germany, maysa a kapautan a tulag ti depensa ti Filipinas iti sabali a pagilian.
Segun ken ni Teodoro, mairaman iti tulag ti dua a militar ti maipapan iti cyber security, defense armaments ken lohistika, ken UN peacekeeping.
Presidente Marcos, saanna a biangan ti impeachment trial ni Sara Duterte
Kalpasan ti panagpirma, angayen dagiti dua nga opisial ti 3rd Philippines-Germany Security and Defense Staff Talks tapno repasuen ken ipasdekda dagiti singasing nga aktibidad a maipatungpal iti tulagan kadagiti mapasungad a tawen.
Timmabuno ni Teodoro iti UN Peacekeeping Ministerial Meeting (UNPKMM) tapno pasingkedanna ti panagkumit ti Filipinas iti kapia iti sangalubongan ken seguridad kas maysa a pagilian a nangbuangay ken mangipapay iti soldado iti UN. (Aaron Recuenco/Manila Bulletin//Lito Hilidon/Bannawag)
