Nagun-od ni agdama a gobernador ti Pangasinan Ramon Guico III ti maikadua a terminona kalpasan a pinarukmana ni dati a gobernador Amado Espino III iti natagtagiuray a panagbalubalda iti elektion.
Nakaala ni Guico iti 881,307 a botos idinto a 784,470 a botos met ken ni Espino iti binnalubal a nakakitaan iti nangato a pannakipartisipar dagiti botante, a 86.76 porsiento kadagiti 2.1 a milion a rehistrado a botante ti probinsia ti nagbotos.
"Maragsakanak a nabotosan manen, kayatna a sawen a mabalintayo nga itultuloy dagiti proyektotayo," kinuna ni Guico, nga inkarina nga idur-asna dagiti programa ti edukasion, salun-at, impraestruktura, ken turismo.
Nailayon met a nabotosan ti running mate-na a ni agdama a bise gobernador Mark Ronald Lambino babaen ti ad-adu pay a nagun-odna a nasurok a maysa a milion a botos. (Hilda Austria/PNA)
