Pinalagipan ti Commission on Elections (Comelec) dagiti amin a kandidato iti 2025 Election--nangabak man wenno saan--a masapul nga idatagda ti Statement of Contributions and Expenditures (SOCE) agingga iti Hunio 11, ta saanen a mayalud-od daytoy.
Impaganetget ni panakangiwat ti Comelec John Rex Laudiangco idi Mayo 14 a nangrugin iti Mayo 13 ti 30-aldaw a naikeddeng a panangipila iti SOCE dagiti kandidato, ket imandar ti linteg ken di mabaliwan ti Comelec.
Kinuna ni Laudiangco a saan a mayalud-od ti maudi nga aldaw ti panangipila iti SOCE, idinto a nagsasaruno ti pangngeddeng ti Korte Suprema nga awan ti turay ti Comelec a mangbalbaliw iti dayta a panawen agsipud ta ti linteg a mismo ti mangibagbaga a 30-aldaw laeng dayta.
Impalagip ni Laudiangco a saan a maawat dagiti SOCE a maipatulod babaen ti email wenno registered mail ta masapul ti pisikal a pannakaberikar ti orihinal a dokumento, pirma, ken resibo.
Presidente Marcos, saanna a biangan ti impeachment trial ni Sara Duterte
Impaganetget ni Laudiangco nga adda nakaro a dusa kadagiti di mangipila iti SOCE, kangrunaan kadagiti nangabak, ta saanda a makapagtugaw iti pagakmanda no awan ti pammaneknek a nangipiladan iti SOCE.
Kadagiti met naabak a di mangidatag iti SOCE, agmulta iti umuna a panaglabsing, idinto nga agnanayon a pannakadiskualipikar iti panagkandidato ti mayetnag a dusa iti maikadua a panaglabsing.
Gapu iti daytoy, indagadag ti Comelec kadagiti amin a kandidato, nga agtungpalda a dagus iti panangidatag iti SOCE tapno maliklikanda ti multa ken legal a parikut nga ibunga daytoy. (Dhel Nazario/Manila Bulletin//Lito Hilidon/Bannawag)
