Pinirmaanen ni Presidente Ferdinand Marcos Jr. ti Republic Act No. 12199, wenno ti Early Childhood Care and Development (ECCD) System Act, idi Mayo 8, a mangipangruna iti nasapa nga edukasion, umisu a nutrision, ken pannakataripato tapno maipaayan dagiti ubbing a Filipino, nangruna dagiti maladaga agingga iti agtawen iti lima, iti nasayaat a biag.
Panggep daytoy a linteg a salakniban ken itandudo ti kalintegan ti tunggal ubing iti naan-anay a kinaragsak, panagdakkel, ken naipamaysa a panangaywan.
Maysa ti ECCD System Act kadagiti kangrunaan a paglintegan nga insingasing ti Second Congressional Commission on Education (EDCOM 2) tapno mapasayaat ti sistema ti edukasion ti pagilian ken masalakniban ti kalintegan dagiti ubbing iti pannakataripato ken panagdakkel.
Segun ken ni Marcos, waswasen ti ECCD System Act ti RA No. 10410 wenno ti Early Years Act of 2013.
Nicholas Kaufman, patienna a ni Presidente Marcos ti pudno a mangidardarum ken ni Duterte
Maibatay iti ECCD System Act, ti ECCD Council ti mapusgan a mangaywan kadagiti ubbing nga agtawen iti nababbaba ngem iti lima, idinto a ti Department of Education (DepEd) ti mangaywan kadagiti agtawen iti lima agingga iti walo, kas maitunos iti Enhanced Basic Education Act of 2013.
Malaksid iti daytoy, mangipaay ti ECCD System iti umisu a serbisio kadagiti ubbing nga addaan iti disability, nainkalintegan a pagdagusan, ken nalaka a madanon a lugar. (Argyll Cyrus Geducos/Manila Bulletin//Lito Hilidon/Bannawag)
