Indeklarar ti Court of Appeals (CA) a null and void ti desision ti Muntinlupa City regional trial court (RTC) a nangabsuelto ken ni Mamamayang Liberal (ML) Party-list first nominee Leila M. De Lima iti maysa a kasona mainaig iti droga.
Pinatgan ti 8th Division ti CA ti petision nga impila ti Office of the Solicitor General (OSG) a nagkuna nga adda grave abuse of discretion iti panangabsuelto ni Muntinlupa City RTC Judge Abraham Joseph B. Alcantara ken ni De Lima.
Idi Mayo 12, 2023, inkeddeng ti Muntinlupa RTC a ti panangibabawi ni dati a hepe ti Bureau of Corrections (BuCor) Rafael Ragos ti nangpataud iti nainkalintegan a panagduadua iti pannakairaman ni De Lima iti illegal a panaglako ti droga iti uneg ti New Bilibid Prison.
Segun iti CA, tapno maaddaan iti legal nga epekto ti ania man a desision wenno pangngeddeng iti kaso a kriminal, masapul a maitunos daytoy iti pagalagadan iti kinabatad, kinalawag, ken nainkalintegan kas imbilin nga agpadpada ti Konstitusion ken ti Rules of Court, banag a segun iti CA, di natungpal ti RTC itoy a kaso.
Umisu a bilang ti mairaman a party-list, resolbaren ti Comelec
Kinuna ti CA a ti pannakaabsuelto a nayetnag babaen ti pangngeddeng a namulitan iti nakaro a panangabuso iti wayawaya nga agdesision ket saan a maibilang a pannakaabsuelto a maikari iti pannakasalaknib maibusor iti double jeopardy.
Iti maysa nga statement, kinuna ni De Lima nga idatagda ti desision ti CA agingga iti Korte Suprema, ket iparangda iti CA dagiti paset ti record a pakasarakan iti sungbat kadagiti saludsod ti CA.
Innayon ni De Lima a saan a winaswas ti CA ti pannakaabsueltona, no di ket panangilawlawag laeng iti linaon ti desision, a patienna a saanen a kasapulan ta nalawagen ti desision ti RTC. (Benjamin Pulta/PNA//Lito Hilidon/Bannawag)
