Usaren ti gobierno dagiti diplomatiko a wagas tapno maipatungpal ti warrant of arrest nga impaulog ti korte maibusor iti dati a panakangiwat ti presidente a ni Harry Roque a naidarum iti kaso a saan a mapiansaan a qualified human trafficking.
Maysa kadagitoy ti panagdawat ti tulong iti International Criminal Police Organization (Interpol).
Naibilin ti pannakaarestar ni Roque ken dagiti kakaduana a naidarum iti Angeles City regional trial court (RTC).
Naibilin a maarestar ti 63 pay a naidarum iti kapadana a kaso agraman ni Dennis L. Cunanan a dati a director general ti Technology Resource Center (TRC), ken Katherine Cassandra Li Ong, maysa nga opisial ti Lucky South 99.
Saanmi a pangpangtaan ti asino man --Malakanyang
Nagtaud daytoy iti mapapati a kriminal nga aktibidad ti Lucky South 99, maysa a Philippine Offshore Gaming Operator (POGO) iti Porac, Pampanga nga impaserran ti gobierno.
Pimmanaw ni Roque iti Filipinas idi napan a tawen, ket adda ita iti The Netherlnads tapno agkiddaw iti political asylum.
Segun ken ni Assistant Secretary ti DOJ Jose Dominic F. Clavano IV, gapu ta adda iti ballasiw-taaw ni Roque, agdalan iti diplomatiko a wagas ti pannakaarestar daytoy.
Agkiddaw ti prosecution a maipakat ti hold departure order para kadagiti kakadua ni Roque nga adda iti Filipinas, tapno saanda a makaruar iti pagilian. (Jeff Damicog/Manila Bulletin//Lito Hilidon/Bannawag)
