Nagparintumeng ti baro a gobernador ti Cagayan a ni Edgar Aglipay idinto a dinawatna ti panagkaykaysa iti probinsia iti sanguanan dagiti dadduma nga opisial bayat ti proklamasionda idi Mierkoles, Mayo 14.

Indagadag ni kabbotos a gobernador ti Cagayan Edgar Aglipay ti panagkaykaysa ti amin iti probinsiana bayat ti proklamasionna idi Mierkoles, Mayo 14.

Maysa a retirado a heneral ti polis ken nagpaay a hepe ti Philippine National Police, nagparintumeng pay ni Aglipay iti sango dagiti padana a nabotosan nga opisial iti panangkiddawna iti panagkaykaysa tapno masigurado ti kinatalged dagiti umili ti Cagayan, partikular dagiti mannalon ken mangngalap.

Kinunana nga optimistiko a malapdanna ti panagsusupiat dagiti lider agsipud ta aminda, maymaysa ti panggepda a sipupudno a panagserbi iti probinsia.

Kadua ni Aglipay nga improklamar ti Provincial Board of Canvassers da Bise Gobenador Manuel Mamba ken dagiti kongresista a da Ramon Nolasco Sr., umuna a distrito; Aline Vargas-Alfonso, maikadua a distrito, ken Joseph Lara, maikatlo a distrito.

Lokal

Gobernador, bise gobernador ti Pangasinan, nailayon

Naiproklamar met dagiti mangbukel iti hunta probinsial a da Rowena Retoma, Kamille Ponce, ken Romeo Garcia ti umuna a distrito; Randy Ursulum, Kevin Timbas, ken Vilmer Viloria ti maikadua a distrito; ken AJ Ponce, Romar de Asis, Engelbert Caronan, ken Odiboy Fausto Jr. ti maikatlo a distrito. (Liezle Basa Iñigo/MB)