Napaay ti panggep dagiti mangsupsuportar ken ni dati a Presidente Rodrigo Duterte a mangkibur iti ayus ti remittance wenno panangipatulod iti kuarta manipud iti ballasiw-taaw babaen ti bukodda nga indeklarar a "no remittance week” idi Marso, gapu ta ngimmato iti 2.6 a porsiento iti dayta a bulan ti cash nga impatulod dagiti Filipino iti Filipinas kas impakita ti datos manipud iti Bangko Sentral ng Pilipinas (BSP).
Immadu ti kuarta nga impatulod dagiti Filipino nga agtrabtrabaho ken agnanaed iti ballasiw-taaw iti $2.81 a bilion idi Marso manipud iti $2.74 a bilion iti isu met laeng a bulan idi napan a tawen, segun iti datos ti BSP.
Dimmakkel met ti cash remittances iti 2.7 a porsiento agingga iti $8.44 bilion iti umuna a kuarter ti 2025, nga immadu manipud iti $8.22 bilion bayat ti isu met laeng a panawen idi 2024.
Nagtalinaed a natibker ti remittances ken nagtultuloy a dimmakkel iti laksid ti pangta dagiti mangsupsuportar iti naibalud a dati a presidente nga isardengdan ti agipatulod iti kuarta kadagiti pamiliada iti Filpinas.
Umisu a bilang ti mairaman a party-list, resolbaren ti Comelec
Idi Marso, inwaragawag dagiti DDS (diehard Duterte supporters) ti “no remittance week” kalpasan ti pannakaarestar ken pannakaidarum ni Duterte iti The Hague, Netherlands. Nupay kasta, agparparang a saan nga epektibo ti tignay dagiti DDS, ta ipakita ti datos ti year-on-year a yaadu ti remittances.
Segun iti statement ti BSP a nairuar idi Huebes, Mayo 15, dagiti kangrunaan a nakatulong iti first quarter’s cash remittances ket dagiti pondo a naipatulod manipud Estados Unidos, Singapore, Saudi Arabia, ken United Arab Emirates. (Derco Rosal/MANILA BULLETIN)
