Insingasing ni Senate President Francis “Chiz” Escudero iti Senado a pagtalinaedenda ti agdama a paglintegan para iti umadani nga impeachment trial ni Bise Presidente Sara Duterte, tapno saanda a pagduaduaan ti kinapatas ti Senado.
Daytoy ti kinuna ni Escudero idi Mayo 15 iti baet ti kaadu ti singasing a pannakabalbaliw nga indatag ti adu a senador ken eksperto iti linteg.
Kinuna ni Escudero a no adda man masapul a mabaliwan iti rules of impeachment, mayaplikar daytoy kadagiti mapasungad nga impeachment, ket saan nga iti kaso ni Duterte.
Inlawlawag ni Escudero a masapul nga anamongan ti impeachment court dagiti singasing a pannakabalbaliw.
Pimmatay iti 2 a polis iti Bulacan, natay a nakipinnaltog iti Cagayan
Agsubli ti sesion ti Senado inton Hunio 2, ket manamnama a maummong ti impeachment court iti sumaruno nga aldaw. Imbinsabinsa ni Escudero ti proseso a mangyusuat iti impeachment trial ni Duterte.
Segun ken ni Escudero, mangipatulodda iti pakaammo iti Kamara itoy a lawas a mangawis nga iparangda ti articles of impeachment iti plenario ti Senado. Innayon ni Escudero a dagiti prosecutor--saan laeng a ti majority leader--ti mangibasa iti articles of impeachment iti plenario, kas maitunos iti paglintegan.
Kas iti damo, saan a kayat ni Escudero ti agkomento kadagiti mabalin a mapasamak iti impeachment trial, ta saanna kayat a pasakbayan ti ania man a pagbanagan ti impeachment trial, ket baybay-anna lattan ti panagtulid ti proseso ken agdesision ti impeachment court.
Impaganetget ni Escudero nga agdesision dagiti senador para iti bukodda, ket sanguendanto dagiti nadumaduma a parikut kas kameng ti Senado a pannakabagi dagiti umili a nangibotos kadakuada. (Dhel Nazario/Manila Bulletin//Lito Hilidon/Bannawag)
